*लसीकरणाला नागरीकांची गर्दी;परळी शहरात छ. शिवाजी महाराज चौक परिसरात आणखी एक लसीकरण केंद्र वाढवा - अॅड.अरुण पाठक*
परळी वैजनाथ (प्रतिनिधी-)
परळी शहरात कोरोना विषाणूचा प्रादुर्भाव टाळण्यासाठी लसीकरण मोहिमेला सुरुवात यापुर्वीच झाली असून लसीकरणाचा दुसरा टप्पा १मे पासून १८ ते ४५ वयोगटातील नागरिकांसाठी सुरु झाला आहे.शहरात लसीकरणाला वाढलेल्या गर्दीमुळे सामाजिक सुरक्षीत अंतर ठेवण्यातसुद्धा अपयश येत आहे. या पार्श्वभूमीवर शहरात छ. शिवाजी महाराज चौक परिसरात आणखी एक लसीकरण केंद्र वाढवा अशी मागणी भाजयुमो प्रदेश चिटणीस अॅड.अरुण पाठक यांनी केली आहे .
परळी शहरात लसीकरणाच्या दुसर्या टप्प्याला सुरुवात झाल्यानंतर कोव्हीडची लस घेण्यासाठी मोठी गर्दी होतांना दिसत आहे. वाढलेल्या गर्दीत अनेकजण मास्क न लावता रांगेत उभे असतात. तर एकमेकांपासून सुरक्षीत अंतरही ठेवले जात नसल्याचे चित्र पहायला मिळते. कोरोना विषाणूचा संसर्ग रोखण्यासाठी एकीकडे लस घेत असतांना आपण दुसरीकडे कोरोनाचा संसर्ग वाढवत आहोत याचेही भान नागरिक नाईलाजाने ठेवू शकत नाहीत. या पार्श्वभूमीवर एकाच ठिकाणी होणारी गर्दी टाळण्यासाठी शहरातील गणेशपार भागात असलेल्या प्राथमिक आरोग्य केंद्र व औष्णीक विद्युत केंद्राच्या शक्तीकुंज वसाहत येथे असलेल्या आरोग्य केंद्रात लसीकरण सुविधा उपलब्ध करुन देण्यात आली आहे.त्याचप्रमाणे छ. शिवाजी महाराज चौक परिसरात आणखी एक लसीकरण केंद्र वाढवण्याची नितांत आवश्यकता आहे. जेणेकरून विद्यानगर प्रियानगर जलालपुर व अन्य परिसरातील नागरिकांची गैरसोय दूर होणार आहे.
एकापेक्षा जास्त ठिकाणी लसीकरण सुविधा असेल तर आरोग्य यंत्रणेवरही अधिकचा ताण पडणार नाही. तसेच नागरिकांच्या गर्दीतून कोरोनाचा प्रसारही होणार नाही. शहरात शिवाजी महाराज चौक परिसरात केंद्र सुरू करुन आवश्यक असलेली यंत्रणा तातडीने कार्यान्वित करुन नागरिकांना लसीकरण सुविधा उपलब्ध करुन द्यावी अशी मागणी भाजयुमो चिटणीस अॅड.अरुण पाठक यांनी केली आहे.
टिप्पण्या
टिप्पणी पोस्ट करा