MB NEWS- *प्रामाणिकपणा : ६५हजार रोख व अतिमहत्त्वाची कागदपत्रे असलेली रस्त्यावर सापडलेली बॅग केली सुपूर्द*

प्रामाणिकपणा : ६५हजार रोख व अतिमहत्त्वाची कागदपत्रे असलेली रस्त्यावर सापडलेली बॅग केली सुपूर्द

परळी वैजनाथ, प्रतिनिधी....

      ६५हजार रोख व अतिमहत्त्वाची कागदपत्रे असलेली रस्त्यावर सापडलेली बॅग पोलिसांकडे जमा केली व ज्याची होती त्याला सुपुर्द करण्यात आली.एका हाॅटेल चालकाने हा प्रामाणिकपणा दाखवला.त्याबद्दल पोलिसांनी त्यांचा सत्कार करुन कौतुक केले.

       प्रामाणिक माणसेही आजही आहेत याचे मूर्तिमंत उदाहरण शनिवारी परळीत घडलेल्या घटनेवरून लक्षात येईल. विशाल हॉटेलचे संचालक दत्ता लहूदास मुंडे यांनी हा प्रमाणिकपणा सिद्ध केला आहे. अंबाजोगाई येथील रहिवासी शेख सादेक हे परळीहून अंबाजोगाईला  रिक्षाने जात होते. आपली बॅग त्यांनी रिक्षाच्या मागच्या बाजूस  ठेवली. अंबाजोगाई येथे पोचल्यानंतर रिक्षातून उतरत असतांना आपली बॅग नसल्याचं लक्षात आलं.  परळी ते अंबाजोगाई रोडवर कण्हेरवाडी येथील विशाल हॉटेलचे मालक दत्ता लहूदास मुंडे यांना हॉटेलसमोर मुख्य रस्त्यावर बॅग पडलेली आढळून आली. बॅग त्यांनी तात्काळ शहर पोलीस ठाण्यात आणून दिली. बॅग मालकाचा शोध घेतला.बॅगमधील महत्वाची कागदपत्रे आणि रोख रक्कम 65 हजार रुपये शेख सादेक यांना परत देण्यात आली. हॉटेलमलकाच्या प्रमाणिकपणाबद्दल शहर पोलीस ठाण्यात त्यांचा सत्कार करण्यात आला. यावेळी शहर पोलीस ठाण्याचे पोलीस निरीक्षक उमाशंकर कस्तुरे, संभाजीनगर ठाण्याचे पोलीस निरीक्षक सुरेश चाटे, डीबीचे प्रमुख भास्कर केंद्रे, निर्मळ तात्या, शंकर बुडडे, तुकाराम मुरकुटे, सुंदर केंद्रे यांच्यासह पोलीस आणि पत्रकार उपस्थित होते.