MB NEWS-…तर मी लगेच राजीनामा देण्यास तयार – मुख्यमंत्री उद्धव ठाकरे

 …तर मी लगेच राजीनामा देण्यास तयार – मुख्यमंत्री उद्धव ठाकरे

  मुंबई....    मी मुख्यमंत्री पद आणि पक्षप्रमुख सोडायला तयार आहे. शिवसेनेचा मुख्यमंत्री झाला तर मला आनंद आहे. पण समोर येऊन सांगा... मी आव्हानांना तोंड देणारा माणूस आहे. 

       शिवसेना नेते एकनाथ शिंदे यांनी बंड पुकारल्यामुळे महाविकास आघाडी सरकार अडचणीत आले आहे. त्यांची समजूत घालण्यासाठी आणि महाविकास आघाडी सरकार वाचवण्यासाठी राज्यात राजकीय हालचालींना वेग आला आहे. मात्र, या चर्चेतून अद्याप कोणताही मार्ग निघाला नसून चर्चा निष्फळ ठरल्याचं दिसत आहे. यानंतर मुख्यमंत्री उद्धव ठाकरे यांनी महाराष्ट्रातील जनतेशी संवाद साधत आपली भूमिका स्पष्ट केली आहे. ही शिवसेना बाळासाहेबांची राहिली नाही म्हणणाऱ्यांसाठी माझ्याकडे उत्तर आहे. मी आव्हानाला सामोरं जाणारा माणूस आहे, पाठ दाखवणारा नाही, असे मुख्यमंत्र्यांनी फेसबुक लाईव्हमध्ये म्हटले आहे.

     एकनाथ शिंदे शिवसेनेचे ३३ तर अपक्ष सात अशा एकूण ४० आमदारांना सोबत घेऊन सुरतहून आसाममधील गुवाहाटी येथे पोहोचले आहेत. या आमदारांना रात्रीच चार्टर्ड विमानाने गुवाहाटी येथे एअर लिफ्ट करण्यात आले होते. तसेच एकनाथ शिंदे यांनी आमच्याकडे बहुमत असल्याचे म्हटले असून शिवसेनेने निवडलेला गटनेता हा घटनाबाह्य असल्याचेही म्हटले.