MB NEWS-माणिकनगर येथे भागवत कथा सोहळ्याची उत्साहात सांगता

 संतसंगतीने जीवनाला मिळते आदर्श दिशा : हभप नारायण महाराज बारटक्के

माणिकनगर येथे भागवत कथा सोहळ्याची उत्साहात सांगता

*ह भ प उत्तम महाराज होळंबे यांचे काल्याचे किर्तन; सवाद्य मिरवणुकीने निघाली श्रींची दिंडी*

*परळी वैजनाथ/प्रतिनिधी*

समस्त प्राणिमात्रांचे कल्याण श्रीमद्भागवत कथेत सांगितले आहे . भागवत कथेतून सांगितलेल्या ज्ञानाचा आत्मसात केल्यास मनुष्याच्या जीवनात सुख , शांती व समृद्धी लाभणार आहे . तर संतसंगतीने जीवनाला वेगळीच दिशा मिळते , असे प्रतिपादन भागवताचार्य ह.भ.प.श्री नारायण महाराज बारटक्के यांनी केले . 

परळी वैजनाथ येथील माणिकनगर भागातील श्री महारुद्र संस्थान हनुमान मंदिर येथे श्रीमद् भागवत कथा ज्ञानयज्ञ सोहळा सप्ताह उत्साहात व धार्मिक वातावरणात पार पडला . दरम्यान आज सकाळी श्रींची स्वाद्य मिरवणुकीने दिंडी काढण्यात आली. यात महिला पुरुष भावीक मोठ्या संख्येने सहभागी झाले होते . भागवत कथेची सांगता ह भ प उत्तम महाराज होळंबे यांच्या काल्याच्या कीर्तनाने झाली.  भागवत कथा सप्ताहाचे निरुपण भागवताचार्य ह.भ.प.श्री नारायण महाराज बारटक्के यांनी केले . यावेळी ते बोलत होते . 

सात दिवस चाललेल्या या कथा सप्ताहाला पंचक्रोशीतील भाविकांचा उत्सफुर्त प्रतिसाद लाभला .  कथेसाठी त्यांना नामांकित मृदंग वादक ह . भ . प . बाळू महाराज वरवटकर, ह भ प उत्तम महाराज होळंबे यांनी आपल्या सुमधुर व ओजस्वी वाणीतून विविध भजने सादर केली. त्यांना ह भ प शेषराव महाराज वरवटकर माणिक महाराज धाकपाडे  आदींची संगत लाभली . पुढे भागवताचार्य ह.भ.प.श्री नारायण महाराज बारटक्के महाराज म्हणाले की , श्रीमद् भागवत कथा हे ग्रंथ नसून प्रत्यक्ष भगवान श्रीकृष्णची वाणी आहे . या कथेत भगवंतांचे २४ अवतार यांची कथा असून , विशेष श्रीकृष्ण भगवंताच्या बाल लीलांचे वर्णन करणारी व सर्वांना आनंद देणारी आहे . कथेतील प्रत्येक पात्र हे एक शिकवण देत असते . या कथेचे निरुपण संत , महंत , कथा - कीर्तनकार व भागवताचार्य आपल्या अनुभवातून व अभ्यासातून करीत असल्याचे त्यांनी स्पष्ट केले . या सप्ताहाचा समारोप ह . भ . प . श्री उत्तम महाराज होळंबे यांच्या काल्याचे कीर्तनाने झाला . यावेळी माणिक नगर भागातील भाविक भक्त महिला मंडळ मोठ्या संख्येने उपस्थित होते .  हा सप्ताह यशस्वी करण्यासाठी माणिक नगर भागातील महिला मंडळ यांनी सप्ताहाच्या आयोजन व नियोजनासाठी विशेष परिश्रम घेतले .