MB NEWS:सकाळी 8 वाजता घडला अपघात; उपचारादरम्यान मालवली प्राणज्योत

 अज्ञात वाहनाच्या धडकेत पोलीस कर्मचाऱ्याच्या आईचा मृत्यू

सकाळी 8 वाजता घडला अपघात; उपचारादरम्यान मालवली प्राणज्योत

परळी वैजनाथ (प्रतिनिधी)

दिवसेंदिवस परळी शहरातील अपघातांचे प्रमाण वाढत आहे. शहरातील रहदारीच्या रस्त्याने सुसाट आणि अनियंत्रित मोटारसायकली पळवण्याचे सर्रास प्रकार होत असून, याचा फटका एका पोलीस कर्मचाऱ्यालाच रविवारी बसला. अतिप्रचंड वेगात धावणाऱ्या मोटारसायकलने पाठीमागून जोराची धडक दिल्याने पोलीस कर्मचाऱ्याच्या वयोवृद्ध आईचा दुर्दैवी मृत्यू झाला आहे. रविवारी सकाळी 8 वाजण्याच्या सुमारास सदरील घटना घडली.

अंबाजोगाई शहर पोलीस स्टेशन येथील सहाय्यक पोलीस उपनिरीक्षक राजेभाऊ शेळके यांच्या मातोश्री प्रयागबाई बळीराम शेळके (वय - 75) यांचे रविवारी सकाळी झालेल्या अपघातात दुःखद निधन झाले. 

याबाबत सविस्तर असे की, सहाय्यक पोलीस उपनिरीक्षक राजेभाऊ शेळके यांच्या मातोश्री प्रयागबाई शेळके या परळी शहरातील उड्डाणपूल शेजारील रस्त्यावरून पायी चालत जात असताना सकाळी 8 वाजण्याच्या सुमारास अज्ञात वाहनाने धडक दिल्याने त्या जखमी झाल्या होत्या.  उपचारासाठी परळी उपजिल्हा रुग्णालय येथे त्यांना आणण्यात आले होते मात्र त्यांचा मृत्यू झाल्याचे डॉक्टरांनी घोषित केले.