देवीची घटस्थापना विधिवत होणार; विजया दशमीच्या दिवशी दुष्ट प्रवृत्तीच्या रावणाचे दहन

 यंदाचा दुर्गोत्सव साधेपणाने साजरा करणार - फुलचंद कराड

देवीची घटस्थापना विधिवत होणार; विजया दशमीच्या दिवशी दुष्ट प्रवृत्तीच्या रावणाचे दहन

बालयोगी भागवताचार्य ह.भ.प.हरिहर महाराज दिवेगावकर यांच्या किर्तनाचे आयोजन

परळी (प्रतिनिधी)

श्री संत भगवानबाबा प्रतिष्ठानच्या वतीने साजरा केला जाणारा दुर्गोत्सव दुष्काळी पार्श्वभूमी लक्षात घेता यंदा अत्यंत साधेपणाने साजरा करण्यात येणार आहे. रविवारी देवीची घटस्थापना केली जाणार असून, विजया दशमीच्या दिवशी वाईट विचार आणि दुष्ट प्रवृत्तीच्या रावणाचे दहन केले जाणार आहे. त्याच बरोबर समाज प्रबोधन व्हावे यासाठी बालयोगी भागवताचार्य ह.भ. प.हरिहर महाराज दिवेगावकर यांच्या कीर्तनाचे आयोजन करण्यात येणार असल्याची माहिती श्री संत भगवानबाबा प्रतिष्ठानचे संस्थापक अध्यक्ष फुलचंद कराड यांनी दिली. संपर्क कार्यालयात घेण्यात आलेल्या पत्रकार परिषदेत ते उपस्थितांशी संवाद साधत होते.

फुलचंद कराड अध्यक्ष असलेल्या श्री संत भगवानबाबा प्रतिष्ठानच्या वतीने दरवर्षी दुर्गोत्सव दणक्यात साजरा केला जातो. दरवर्षी मोंढा भागात देवीची घटस्थापना करून नऊ दिवस विविध स्वरूपाचे भव्य सांस्कृतिक कार्यक्रम घेतले जातात. यंदा पावसाने दडी मारल्याने बळीराजा संकटात आहे. अशा कठीण काळात मोठे मोठे कार्यक्रम घेणे योग्य राहणार नाही. त्यामुळे यंदा हा दुर्गोत्सव अत्यंत साधेपणाने साजरा केला जाईल अशी माहिती फुलचंद कराड यांनी दिली. रविवार दि.१५ ऑक्टोबर रोजी सायंकाळी फुलचंद कराड यांच्या कार्यालयासमोर देवीच्या विशाल मूर्तीची  घटस्थापना करण्यात येईल. नऊ दिवस विधिवत पूजा अर्चा चालणार आहेत. दरवर्षी प्रमाणे यंदाही वाईट प्रवृत्तीच्या रावणाचे दहन केले जाणार असून, विजया दशमीच्या दिवशी तोतला मैदान येथे या कार्यक्रमाचे आयोजन करण्यात आले आहे. लोकप्रबोधन व्हावे यासाठी दि.१९ ऑक्टोबर रोजी रात्री ८.००वाजता बालयोगी भागवताचार्य ह.भ.प.हरिहर महाराज दिवेगावकर यांच्या सुश्राव्य कीर्तनाचे आयोजन करण्यात आले आहे अशी माहिती श्री संत भगवानबाबा दुर्गोत्सव मंडळाचे संस्थापक अध्यक्ष फुलचंद कराड यांनी पत्रकार परिषदेत दिली.