पालकमंत्री धनंजय मुंडेंच्या प्रशासनास दूरध्वनीवरून सूचना

 अंबड बस-ट्रक अपघाताची घटना वेदनादायी - धनंजय मुंडे

जखमींना योग्य उपचार मिळावेत यासाठी पालकमंत्री धनंजय मुंडेंच्या प्रशासनास दूरध्वनीवरून सूचना

परळी वैजनाथ(दि. 20) - गेवराई वरून जालन्याकडे जात असलेल्या राज्य परिवहन महामंडळाच्या बसला अंबड जवळ संत्र्याच्या ट्रकने दिलेल्या धडकेत एसटी बस मधील सहा तर ट्रक मधील दोन अशा एकूण आठ जणांचा मृत्यू झाल्याचे समजले असून ही दुर्घटना अत्यंत वेदनादायी असल्याचे म्हणत जिल्ह्याचे पालकमंत्री धनंजय मुंडे यांनी या भीषण अपघाताबद्दल दुःख व्यक्त केले आहे. 

याच अपघातात आपला जुना सहकारी, बसचालक बंडू बारगजे यांचे दुःखद निधन झाले असून, त्याबद्दलही धनंजय मुंडे यांनी दुःख व्यक्त केले आहे.

गेवराई वरून जालन्याकडे जात असलेल्या एसटी बसला सकाळी नऊच्या सुमारास अंबड जवळ एका संत्र्याच्या ट्रकने धडक दिल्याने झालेल्या भीषण अपघातात एसटी बसचे चालक वाहक व अन्य चार प्रवासी तर ट्रकचा चालक व क्लीनर अशा एकूण आठ जणांचा मृत्यू झाला आहे. तर जवळपास 15 ते 20 जण जखमी असून यापैकी नऊ जणांना प्रथमोपचार करून जालना येथे शासकीय रुग्णालयात दाखल करण्यात आले असून त्यापैकी एका जणाची प्रकृती गंभीर असल्याचे जिल्हा शल्यचिकित्सक डॉ. राजेंद्र पाटील यांनी सांगितले आहे. 

तर किरकोळ जखमी असलेल्या उर्वरित प्रवाशांना अंबड येथील रुग्णालयात उपचारार्थ दाखल करण्यात आले आहे. दरम्यान बीडचे पालकमंत्री धनंजय मुंडे यांनी पोलीस प्रशासनाकडून अपघाताची माहिती घेऊन जखमींवर योग्य उपचार केले जावेत, याबाबत जालना जिल्हा प्रशासनास आवश्यक सूचना दूरध्वनीवरून केल्या आहेत. 

हा अपघात अत्यंत दुर्दैवी असून मयत प्रवाशांना श्रद्धांजली अर्पण करतो तसेच त्यांच्या कुटुंबीयांच्या दुःखात मी सहभागी आहे. जखमी प्रवाशांना देखील योग्य उपचार मिळून त्यांना लवकरात लवकर आराम मिळो, अशी प्रार्थना करतो, असेही धनंजय मुंडे यांनी म्हटले आहे.