टेम्पोतुन जप्त केलेल्या एका बैलाचा मृत्यु

 हैद्राबादकडे कत्तलीसाठी जात असलेल्या 18 बैलांची मुक्तता,तिघांविरुध्द गुन्हा

टेम्पोतुन जप्त केलेल्या एका बैलाचा मृत्यु

परळी (प्रतिनिधी)

 वडोदा बाजार येथुन हैद्राबादकडे एका टेम्पोमध्ये एकमेकांचे तोंड बांधून कत्तलीसाठी जात असलेल्या 18 बैलांची सुटका काही युवकांनी केली.याप्रकरणी संभाजीनगर पोलिस ठाण्यात सिल्लोड येथील तिघांविरुध्द गुन्हा दाखल करण्यात आला आहे.सुटका करण्यात आलेल्या 18 पैकी एका बैलाचा दुर्देवाने मृत्यु झाला.

 सिरसाळा परिसरातील काही युवकांना एका टेम्पोतुन हैद्राबादकडे कत्तलीसाठी जनावरे जाणार असल्याची माहिती मिळताच आकाश लक्ष्मण तांबडे व अन्य युवक दि.13 ऑक्टोबर रोजी रात्री दहाच्या सुमारास जवळा पाटीवर थांबल्यानंतर आलेल्या एका टेम्पोला थांबण्याचा प्रयत्न केला परंतु हा टेम्पो न थांबल्याने त्याचा पाठलाग करत परळी येथील रिलायन्स पेट्रोलपंपासमोर अडवला असता त्यात 4 लाख 26 हजार रुपये किंमतीचे 18 बैल आढळुन आले.याप्रकरणी संभाजीनगर पोलिसांना कळविल्यानंतर आकाश तांबडे यांच्या फिर्यादीवरुन  सिल्लोड,जि.छत्रपती संभाजीनगर येथील शेख मोसिन शेख बशीर,आरबाज मस्तान शेख व कादीर शेख नजीर यांच्याविरुध्द गुन्हा दाखल करण्यात आला आहे.जप्त करण्यात आलेल्या 18 बैलापैकी एका बैलाचा दि.14 ऑक्टोबर रोजी मृत्यु झाल्याने त्याचे शवविच्छेदन करुन अंत्यसंस्कार करण्यात आले.जप्त केलेले सर्व बैल गोशाळेत सोडणार असल्याचे पो.नि.धनंजय ढोने यांनी सांगितले.