प्रदूषण नियंत्रणासाठीचा स्वतंत्र आराखडा पायलट प्रोजेक्ट म्हणून राबविणार

 शंकराचार्य स्वामी अविमुक्तेश्वरानंद सरस्वतीजींच्या हस्ते श्रीमुर्ती प्राणप्रतिष्ठा

 ⟩⟩ संत-महंतांची विशेष उपस्थिती ; काल्याचे कीर्तनाने  उद्या समारोप.  

परळी | प्रतिनिधी
दि.४ डिसेंबर २०२४

तालुक्यातील श्री क्षेत्र दत्तधाम, सारडगाव येथे सोमवार (दि.२) पासून संत साहित्यिक तथा प्रसिद्ध कथावाचक विद्यावाचस्पती स्वामी डॉ.तुळशीराम गुट्टे महाराज यांच्या मार्गदर्शनाखाली भव्य दिव्य श्री दत्तात्रय भगवान (त्रिमुखी) भव्य प्राणप्रतिष्ठा सोहळा, दत्तयाग व चार दिवसीय कीर्तन महोत्सवाचे आयोजन करण्यात आले आहे. या सोहळ्यात आज गुरुवार दि.५ रोजी बद्रीनाथ येथील परमाराध्य परमधर्माधीश उत्तराम्नाय ज्योतिष्पीठाधीश्वर जगद्गुरु शंकराचार्य स्वामिश्रीः अविमुक्तेश्वरानन्दः सरस्वती १००८ यांची विशेष उपस्थिती लाभणार असून स्वामीजींच्या शुभहस्ते विधिवत महापुजेने श्री दत्तात्रय भगवानजींच्या त्रिमुखी मूर्तीची प्राणप्रतिष्ठापना होणार आहे.

प्राणप्रतिष्ठापनेनंतर जगद्गुरु शंकराचार्य स्वामिश्रीः अविमुक्तेश्वरानन्दः सरस्वतीजी यांच्या रसाळ वाणीत भाविकांना अमृततुल्य प्रवचनाचा लाभ घेता येणार आहे. प्रसंगी वेदांत आश्रम बहादुरगड, हरियाणा, हरिद्वार आणि अखिल भारतीय संत समितीचे उपाध्यक्ष प.पू महामंडलेश्वर स्वामी देवेंद्रानंदगिरी महाराज, जोग महाराज वारकरी शिक्षण संस्थेचे मा.अध्यक्ष ह.भ.प मारुतीबाबा कुरेकर, प.पू वेदांताचार्य विद्यावाचस्पती डॉ.माणिक शास्त्री मुखेकर तसेच उपस्थित संत महंतांच्या शुभ हस्ते कलशारोहण व महापूजा संपन्न होईल होईल.

या कार्यक्रमास श्रीक्षेत्र भगवानगडाचे महंत ह.भ.प डॉ.नामदेव शास्त्री सानप, कृषिमंत्री मा.धनंजय मुंडे, भाजपच्या राष्ट्रीय सचिव मा.पंकजाताई मुंडे, माईर्स एमआयटी पुणे चे मा.कार्यकारी अध्यक्ष राहुल भैया कराड, खा.भागवतराव कराड, आ.चंद्रकांत सोनवणे, आ.संजय दौंड यांच्यासह मान्यवरांची विशेष उपस्थिती राहणार आहे.

मूर्तीप्राणप्रतिष्ठापना, कलशारोहण व महापूजेनंतर लगेचच संत साहित्यिक तथा प्रसिद्ध कथावाचक विद्यावाचस्पती स्वामी डॉ.तुळशीराम गुट्टे महाराज यांच्या काल्याच्या कीर्तनाने या भव्यदिव्य चार दिवसीय कार्यक्रमाचा समारोप होईल.

श्रद्धा, भक्ती, आणि अध्यात्मिक उन्नतीचा महोत्सव असलेल्या या ऐतिहासिक कार्यक्रमास नंदनंज, सारडगावसह परळी पंचक्रोशीतील भाविकांनी मोठ्या संख्येने उपस्थित राहून अध्यात्मिक चैतन्याची अनुभूती घ्यावी असे आवाहन श्री दत्तात्रय भगवान भव्य प्राणप्रतिष्ठा सोहळा, दत्तयाग व चार दिवसीय भव्य कीर्तन महोत्सव आयोजन समितीच्या वतीने करण्यात आले आहे.