घरफोड्यांनी पसरली दहशत: परळीतील शक्तीकुंज वसाहतीत घरफोडीचे सत्र : 4 लाख 51 हजारांचा ऐवज लंपास
पोलिसांनी श्वानपथकासह फॉरेन्सिक तपासाला दिली गती
परळी /प्रतिनिधी
परळी वीज निर्मिती केंद्राच्या कर्मचाऱ्यांसाठी असलेल्या शक्तीकुंज वसाहतीत घरफोडीचे सत्र सुरू असुन एका मागे एक अनेक कर्मचाऱ्यांच्या घरांवर चोरट्यांनी डल्ला मारला आहे.चोरीच्या घटना पाहता मुख्य अभियंतांनी वसाहतीत सुरक्षा व्यवस्था कडक करण्या कडे लक्ष देण्याची गरज आहे.
याबाबत अधिक माहिती अशी की, परळी वीज निर्मिती केंद्राच्या अधिकारी आणि कर्मचाऱ्यांसाठी शक्तीकुंज वसाहतीत अनेक बिल्डिंग आहेत. या बिल्डिंगमध्ये अनेक कर्मचारी राहत असतात. कर्मचारी बाहेरगावी गेल्याचा फायदा घेऊन त्यांच्या कॉटरमध्ये अज्ञात चोरांकडून चोरी केली जात आहे. 20 डिसेंबर रोजी सुग्रीव विष्णू शेप यांचे कॉटर फोडून चोरट्यांनी दोन लाख 35 हजार 500रुपयांची चोरी केली होती. त्यानंतर लागोपाठ सखाराम घुगे, पवार, सुनील चाटे, रत्नमाला देशमुख , सुग्रीव शेप यांच्या घरी चोरी झाली.
चोरट्यांचे हे थर्मल काॅलनी मधील चोरीचे सत्र अद्यापही सुरूच आहे. दिनांक 2 फेब्रुवारी रोजी संजीव मुंडे यांच्या ई 14 बिल्डिंग मधील कॉटर नंबर 79 या त्यांच्या घरातील ते घरी नसल्याचा फायदा घेऊन चोरट्यांनी नगदी 50 हजार रुपये व तीन लाख 86 हजार रुपयांची सोन्या-चांदीचे दागिने लंपास केले.एकूण 4 लाख 51 हजारांचा ऐवज लंपास करण्यात आला आहे. याप्रकरणी संभाजीनगर पोलीस ठाण्यात गुरनं 28/2025 कलम 331(3), 331(4), 305(a),भा.न्या.सं. प्रमाणे गुन्हा दाखल करण्यात आला आहे.
या चोरीच्या घटनांनी वसाहतीतील कर्मचाऱ्यांमध्ये भीतीचे वातावरण पसरले असून कर्मचाऱ्यांच्या घरांच्या सुरक्षेचा प्रश्न निर्माण झाला आहे. एकापाठोपाठ एक होणाऱ्या या चोरीच्या घटनांची संभाजीनगर पोलिसांनी गंभीर दखल घेतली आहे. चोरांचा तपास करताना पोलिसांनी चोरांच्या मागावर श्वान पाठविले. तसेच ज्या ज्या ठिकाणी चोरीच्या घटना घडल्या त्या घरातील फिंगरप्रिंट पोलिसांनी हस्तगत केले आहेत. फॉरेन्सिक तपासाच्या आधारे लवकरात लवकर चोरापर्यंत पोहोचू असे संभाजीनगर पोलीस स्टेशनचे पोलीस निरीक्षक धनंजय ढोणे यांनी सांगितले आहे. तर या कामी एपीआय प्रवीण जाधव, पीएसआय अनिल शिंदे हे ही जिल्हा पोलीस अधीक्षक नवनीत कावत यांच्या मार्गदर्शनाखाली कसून तपास करीत आहेत.
टिप्पण्या
टिप्पणी पोस्ट करा