सुरेश धसांनी आरोप करतांना काढले कौटुंबिक विषय: धनंजय मुंडे उद्विग्न: धसांचा घेतला चांगलाच समाचार
सातत्याने धनंजय मुंडे यांना टार्गेट करून आरोप करणारे सुरेश धस यांनी आता पातळी सोडली असुन आरोप करतांना ते धनंजय मुंडे यांचे कुटुंब व परिवारजन इथपर्यंतही बेताल वक्तव्य करतांना दिसत आहेत.यावर आता धनंजय मुंडे उद्विग्न झाले असुन त्यांनी फेसबुक व अन्य सोशल माध्यमातून पोस्ट करून सुरेश धस यांच्या बेताल वक्तव्याचा चांगलाच समाचार घेतला आहे.
शनिवारी एका वाहिनीवर बोलतांना सुरेश धस यांनी पुन्हा मुंडेंवर निशाणा साधला. 'धनंजय मुंडे हे वाल्मिक कराडच्या एवढे आहारी गेले होते की, त्यामुळे घरातील लोकसुद्धा त्यांच्यावर नाराज असतील, त्यांची आई तर गेल्या दीड वर्षांपासून त्यांच्या मुळ गावी नाथ्रा येथे गेल्या आहेत,' असे सुरेश धस म्हणाले. धसांच्या या विधानावर मुंडेंनी तीव्र शब्दांत प्रतिक्रिया दिली आहे.धनंजय मुंडेंनी ट्विट करत धसांच्या वक्तव्याचा समाचार घेतला.धनंजय मुंडे म्हणाले, परळी वैजनाथ शहरातील पंढरी या माझ्या निवासस्थानाचे नूतनीकरणाचे काम हाती घ्यायचे असल्याने मी, माझी आई व कुटुंबीय मागील काही महिन्यांपासून आमच्या नाथ्रा या जन्म गावात असलेल्या शेतातील घरात स्थलांतरित झालो आहोत, तिथेच राहत आहोत. ही गोष्ट सर्वांनाच माहित आहे. ज्यांनी आरोप केले त्यांनीच याआधी एका मुलाखतीत मी शेतातील घरात राहतो असे सांगितले होते. काल मात्र त्यांनी फक्त माझी आई राहते, असे सांगितले आणि खोटे नाटे आरोप केले. तर मुंडे असेही सुनावले की, 'माझे चुलत भाऊ हे प्रत्येक निर्णयात माझ्या सोबतीने भक्कमपणे उभे असतात, हेही सर्वांना माहित आहे, मात्र त्याबाबतीतही चुकीचे आरोप केले गेले आहेत.
धनंजय मुंडेंनी त्यांच्यावर सुरु असलेल्या आरोपांवरही भाष्य केले. 'मागील काही महिन्यांपासून माझ्यावर सातत्याने आरोप केले जात आहेत. मात्र आता कदाचित आणखी काही खोटे आरोप करायला शिल्लक नसावेत म्हणून काहीजण माझ्या कुटुंबावर सुद्धा असे खोटारडे आरोप करून घृणास्पद राजकारण साधत आहेत, हे उद्विग्न करणारे आहे.' असे बोल मुंडेंनी लावले.'
'राजकीय आणि सामाजिक जीवनात अलीकडच्या काळात माझ्यावर या प्रकारचे खोटे आरोप आणि ड्रामा स्क्रिप्ट रचण्यात आल्या. माझ्या आजार आणि आरोग्यावर व्यंग आणि निंदा केली गेली, शंका निर्माण केल्या गेल्या, तेही सगळं मी सहन केलं. मात्र माझ्या जन्मदात्या आईवर असे खोटे आरोप करण्याची हिम्मत कुणी करत असेल, तर हे स्वीकारणे आणि गप्प राहणे अशक्य आहे.' अशा तीव्र शब्दांत त्यांनी धसांवर प्रहार केला आहे.
टिप्पण्या
टिप्पणी पोस्ट करा