नागरी समस्यांकडे जरा गांभीर्याने बघा!

अंबेवेस रस्त्यावरील फुटलेल्या धोकादायक ढाप्याची त्वरित दुरुस्ती करावी - अश्विन मोगरकर

परळी वैजनाथ,प्रतिनिधी.....

प्रभाग क्रमांक 5 मधील अंबेवेस ते भाजी मंडई रोडवरील ढाप्याचे काम निकृष्ट दर्जाचे झाल्याने  ढापा फुटून त्यातील गज उघडे पडल्याने अपघाताचा धोका वाढला आहे. नगरपरिषदेने त्वरित अपघातास कारणीभूत ठरणाऱ्या सदरील ढाप्याची दुरुस्ती करावी अशी मागणी भाजपाचे अश्विन मोगरकर यांनी केली आहे.

परळी शहरातील अनेक रस्त्यांची कामे चालू आहेत. या रस्त्यांची कामे गुणवत्तापूर्ण व्हावीत याची जबाबदारी नगरपरिषद प्रशासनाची आहे मात्र अनेक कामे अर्धवट तर काही कामे निकृष्ट दर्जाची झाल्याने  प्रशासनाचा गलथान कारभार उघडा पडत आहे. याचा नमुना म्हणजे प्रभाग क्रमांक 5 मधील अंबेवेस ते भाजी मार्केट रोडवरील ढापा मधोमध फुटल्याने त्यातील लोखंडी गज उघडे पडले आहेत. यामुळे अपघाताचा धोका वाढला आहे. या रस्त्याने गावभागातून मोंढ्याकडे जाण्याचा मार्ग असल्याने मोठ्या प्रमाणात वाहतूक या रस्त्यावरून होत असते. अनेक शाळेत जाणारे विद्यार्थी हाच रस्ता वापरतात. भाजीमंडई असल्याने शेतकऱ्यांना आपला शेतमाल नेण्यासाठी हाच रस्ता असल्याने वाहतूक करणाऱ्या वाहनांना या फुटलेल्या ढाप्यामुळे अडचण होत आहे.

दोन दिवसांपूर्वीच शहरातील स्नेह नगर भागात फुटलेल्या ढाप्यात गाय पडून गंभीर जखमी झाली होती. शहरातील अनेक रस्त्यांची कामे अर्धवट सोडलेली आहेत. दोन रस्त्यातील जोड न पूर्ण केल्याने अनेक वाहनचालकांना अचानकपणे ब्रेकचा वापर केल्याने अपघाताला सामोरे जावे लागले आहे. गणेशपार रोडवरील अनेक ठिकाणी जोड रस्ते तसेच सोडून दिल्याने खड्डे तयार झाले आहेत. या कामावर नगरपरिषद अभियंत्याचे कुठलेही लक्ष नसल्याने कामे अर्धवट सोडली जात आहेत. परळी नगरपरिषद प्रशासनाचा आंधळा कारभाराने नागरिकांच्या जीवाशी आला आहे. नगरपरिषद प्रशासन फक्त कार्यालयात बसूनच कारभार हाकत असल्याचा आरोप भाजपाचे अश्विन मोगरकर यांनी केला आहे. 

गावभागातील जोडरस्त्यावरील खड्डे भरून घ्यावेत व अंबेवेस येथील फुटलेला ढापा त्वरित दुरुस्त करण्याची मागणी भाजपाचे अश्विन मोगरकर यांनी केली आहे.