जबरी चोरी...पोलीसांना तपासाचे आव्हान !

वयोवृद्ध जोडप्याचा बीड-परळी- सोनपेठ एसटीने प्रवास: बोरमाळ,गंठण,मोहनमाळ व नेकलेस असे सुमारे ९ लाखांचे सोन्याचे दागिने पळवले !

परळी वैजनाथ, प्रतिनिधी....
      बीडहून परळी आणि परळीहून सोनपेठ येथे एसटीने प्रवास करणाऱ्या सोनपेठ येथील रहिवासी वयोवृद्ध जोडप्याला मोठ्या बिकट प्रसंगाला सामोरे जावे लागले असुन आयुष्यभर पै पै जमा करून कमविलेले सोन्याचे तब्बल ९लाखाचे दागिने चोरीला गेल्याची घटना दि.१० रोजी घडली आहे.याप्रकरणी आता परळीच्या संभाजीनगर पोलीस ठाण्यात अज्ञाताविरुद्ध गुन्हा दाखल करण्यात आला आहे.
     याबाबत पोलीस सूत्रांकडून प्राप्त अधिक माहितीनुसार, फिर्यादी महिला माधुरी सुर्यकांत परळकर वय ६० वर्षे रा.महाजनगल्ली सोनपेठ यांनी संपूर्ण हकिकत नोंदवली आहे.त्यानुसार फिर्यादी महिला व त्यांचे पती हे छ. संभाजीनगर येथे आपल्या मुलीकडे गेले होते. दि. 10/4/2025 रोजी सकाळी 11.00 वा.  संभाजीनगर येथून एस.टी. बसने बीडला आले. बीड येथून  सोनपेठला जाण्यासाठी बीड- परळी बसने दुपारी 12.000 वा. बीड येथून निघून परळीला दुपारी सव्वा दोन ते आडीच वा. सुमारास बस स्थानकात आले.  सोनपेठची बस गेली होती. म्हणुन त्यांनी परळी बस स्थानकावर उसाचा रस घेतला व दुपारी तीन वाजताच्या सुमारास परळी- सोनपेठ  बसने सोनपेठला गेले. घरी गेल्यावर  बॅग तपासली असता बॅग मधील लाल पर्समध्ये ठेवलेले सोन्याचे दागिने  दिसले नाहीत. या पर्समध्ये
1)कि. अंदाजे 3,00,000-(रु) एक खर्बुज्या मन्याची तिन पदरी मोहन माळ सोन्याची राहा तोळे वजनाची जुनी वापरती 2)किं. अंदाजे 3,00,000-(रु) एक सोन्याची पट्टी गंटन राहा तोळे वजनाचे जुने वापरते
3किं. अंदाजे 2,00,000 रु.- एक नेकलेस साखळी पॅडॉलचे सोन्याचे पॅडॉलमध्ये लाल खडा असल्याले चार तोळे वजनाचे जुने वापरते 4किं. अंदाजे 1,00,000 रु. एक सोन्याची बोरमाळ त्यात डिसको मनी असल्याले दोन तोळे वजनाची जुनी वापरती असे एकुण 9,00,000-00 रुपये किमतीचे सोन्याचे दागिने चोरीस गेल्याचे लक्षात आले.
     याप्रकरणी परळीच्या संभाजीनगर पोलीस ठाण्यात अज्ञाताविरुद्ध चोरीच्या गुन्ह्याची नोंद करण्यात आली असुन पुढील तपास संभाजीनगर पोलीस ठाण्याचे पोलीस निरीक्षक धनंजय ढोणे व सहकारी करीत आहेत.