शस्त्रसंधी होणार का ? युद्ध खरच टळणार का?

 भारत-पाक तणाव निवळणार! ट्रम्प यांचा महत्त्वाचा दावा; काल रात्रभर झालेल्या चर्चेत काय घडलं?

        भारत आणि पाकिस्तान यांच्यात सुरु असलेला संघर्ष संपण्याची चिन्हं निर्माण झाली आहेत. यासंदर्भात अमेरिकेचे अध्यक्ष डोनाल्ड ट्रम्प यांनी मध्यस्थीचा दावा केला आहे. दोन्ही देश शस्त्रसंधीसाठी तयार झाल्याचं ट्रम्प यांनी एक्स पोस्टमध्ये म्हटलं आहे.

       गेल्या काही दिवसांपासून भारत आणि पाकिस्तान यांच्यात सुरु असलेल्या तणावाच्या पाश्वभूमीवर अमेरिकेचे डोनाल्ड ट्रम्प यांनी त्यांच्या या एक्स हँडलवरून एक मोठी घोषणा केली आहे. या घोषणेनुसार, भारत आणि पाकिस्तानने संपूर्ण आणि तात्काळ युध्दविरामास सहमती दर्शवली आहे. अमेरिकेने केलेल्या मध्यस्थीनंतर रात्री उशिरापर्यंत चाललेल्या चर्चेअंती हा निर्णय घेण्यात आल्याचे त्यांनी म्हटले आहे. भारत आणि पाकिस्तान अण्वस्त्र संपन्न राष्ट्रं आहेत. त्यामुळे दोन्ही देशांमध्ये युद्ध झाल्यास त्याचे परिणाम जगावर होऊ शकतात. त्यामुळेच अमेरिकेनं यामध्ये मध्यस्थी केली. याबद्दल ट्रम्प यांनी एक पोस्ट केली आहे. 'अमेरिकेनं काल रात्रभर मध्यस्थीसाठी बोलणी केली. त्यात भारत आणि पाकिस्तान पूर्ण आणि तात्काळ शस्त्रसंधीसाठी तयार झाले. त्याबद्दल मी त्यांचं अभिनंदन करतो,' अशी माहिती ट्रम्प यांनी दिली आहे.