आयपीएस विश्वास नांगरे पाटील यांचे नाव घेत भामट्यांनी केली फसवणूक

अंबाजोगाईतील सेवानिवृत्त शिक्षिकेला ‘डिजिटल अरेस्ट’ करून सायबर भामट्यांनी लुटले तब्बल ८३ लाख रुपये

अंबाजोगाई : मी महाराष्ट्र पोलिस बोलत असून तुमच्या नावाने मनी लॉन्ड्रींग आणि अतिरेक्यांना फंडींग झाल्याची माहिती आहे. त्यामुळे आम्हाला सहकार्य करा असे म्हणत व्हाट्सअपला व्हिडीओ कॉल करून निवृत्त शिक्षिकेला डीजिटल अरेस्ट केली. त्यानंतर २१ ते २९ मे या दरम्यान तब्बल ८३ लाख रूपये ऑनलाईन हडप केले. याप्रकरणी सायबर पोलिस ठाण्यात गुन्हा दाखल झाला आहे.

अंबाजोगाई जि.बीड) या निवृत्त शिक्षिका आहेत. २० मे रोजी त्यांच्या ना एका अनोळखी क्रमांकावरून कॉल आला. मी महाराष्ट्र पोलीस संजय पिसे बोलतो असे त्याने सांगितले. नंतर हिंदी भाषेत तो म्हणाला की तुमच्या आधारकार्डवरुन दुसरे सिमकार्ड १६ एप्रिल रोजी घेतले गेले आहे. या सीमकार्डच्या माध्यमातून तुमच्या नावाने मनी लॉन्ड्रीग व अतिरेक्यांना फंडींग झाली आहे. तुम्ही तीन दिवसात सर्व सहकार्य करा आणि आम्ही तुम्हाला यातुन सोडवु. यासाठी आम्ही विश्वास नांगरे पाटील साहेब यांना स्पेशली विनंती केल्याचा विश्वास दिला.

आरोपींनी व्हॉट्सअप व्हिडिओ कॉल द्वारे मुंबई पोलिसांचे ऑफिस, झेंडे, लोगो दाखवून खोटे वातावरण निर्माण केले. “डिजिटल अरेस्ट”मध्ये असल्याचे सांगून, भीती दाखवत शिक्षिकेकडून आर्थिक व्यवहार करवून घेतले. हे सर्व खरे असे समजून या सेवानिवृत्त शिक्षिका यांनी २१ मे रोजी पहिल्यांदा एकाचवेळी ३५ लाख १० हजार रूपये ऑनलाईन पाठविले. त्यानंतर वेगवेगळ्या दिवशी त्यांनी २९ मे पर्यंत ८३ लाख १ हजार ८१६ रूपये सायबर भामट्यांना पाठविले.

या दरम्यान पीडित शिक्षिकेला सातत्याने फोन व व्हिडिओ कॉल करत त्यांच्यावर दडपण आणले जात होते. ३० मे रोजी गुन्हेगारांनी व्हॉट्सअपवरून त्यांना ब्लॉक केले आणि फोन बंद केला. त्यानंतर त्यांना फसवणूक झाल्याचे लक्षात आले आणि सायबर पोलिस ठाणे गाठत फिर्याद दिली. त्यावरून शनिवारी गुन्हा दाखल झाला आहे.

सोने, प्लॉट गहान ठेवून घेतले कर्ज

सायबर भामट्यांनी या सेवानिवृत्त शिक्षिकेला भिती दाखवत तुमच्याकडे कोणती संपत्ती आहे, हे आम्हाला येथे दिसते. तुम्ही लपवुन ठेवु नका, असे सांगितले. त्यानंतर सावित्री यांनी सोने, प्लॉट गहान ठेवुन त्यावर कर्ज घेतले आणि २९ मे रोजी हे सर्व पैसे भामट्यांना ऑनलाईन पाठविले.