#बेशरम_नगरपरिषद हा हॅशटॅग वापरत प्रशासनाच्या बेशिस्त कारभारावर थेट निशाणा

 परळी नगरपरिषदेच्या बेशिस्त कारभारावर अश्विन मोगरकर यांचा हल्लाबोल

अस्वच्छतेवरून पर्यावरण दिनी प्रशासनाची शेलक्या शब्दात  जोरदार कानउघाडणी

परळी, दि. ५ जून – आज जागतिक पर्यावरण दिनाच्या निमित्ताने संपूर्ण देशात स्वच्छता व पर्यावरण संवर्धनाचे महत्त्व अधोरेखित केले जात असताना, परळी शहरातील प्रशासन मात्र अजूनही झोपेत असल्याची टीका भारतीय जनता पक्षाचे कार्यकर्ते अश्विन मोगरकर यांनी केली आहे.

परळीतील स्वच्छतेची स्थिती ही परळी नगरपरिषदेच्या निष्क्रियतेचे जिवंत उदाहरण आहे, असे म्हणत मोगरकर यांनी प्रशासनावर सडकून टीका केली. "स्वच्छतेसाठी अधिकार, निधी आणि जबाबदारी असूनही नगरपरिषद कोणतीच ठोस कारवाई करत नाही. नागरिकांनी अनेकवेळा तक्रारी करूनही याकडे कानाडोळा करण्यात आला आहे," असे ते म्हणाले.

परळी शहरातील अनेक भागांमध्ये घाणीचे साम्राज्य पसरले असून, दुर्गंधी व दूषित पाण्यामुळे आरोग्यधोके वाढत आहेत. "स्वच्छता ही फक्त नागरिकांची जबाबदारी नसून, प्रशासनानेही ती तितक्याच गांभीर्याने घ्यावी लागेल. प्रशासन जबाबदारीने वागले तर नागरिक नक्कीच साथ देतील," असे मोगरकर यांनी नमूद केले.

यावेळी त्यांनी #बेशरम_नगरपरिषद हा हॅशटॅग वापरत प्रशासनाच्या बेशिस्त कारभारावर थेट निशाणा साधला. पर्यावरण दिनासारख्या महत्त्वाच्या दिवशीसुद्धा शहरात कोणतीही स्वच्छता मोहीम न राबविणे हे प्रशासनाच्या उदासीनतेचे लक्षण असल्याचे ते म्हणाले. अश्विन मोगरकर यांनी प्रशासनाकडून तत्काळ कारवाईची मागणी केली आहे.