मेघना बोर्डीकर यांचे ताशेरे – दोषी ठेकेदारांवर तातडीने कारवाईचे आदेश

बीड जिल्ह्यातील ऊर्जा विभागाच्या विविध कामांमध्ये अनियमितता, निकृष्ट दर्जाची कामे व विलंब !

काॅन्ट्रॅक्टर ‘ब्लॅकलिस्ट’ करा- उर्जा राज्यमंत्री बोर्डीकर 

मुंबई – बीड जिल्ह्यातील ऊर्जा विभागाच्या विविध कामांमध्ये होत असलेल्या अनियमितता, निकृष्ट दर्जाचे काम व विलंबामुळे नागरिक त्रस्त झाले आहेत. या पार्श्वभूमीवर महाराष्ट्र राज्याच्या ऊर्जा राज्यमंत्री मेघना बोर्डीकर यांनी बीड जिल्ह्यात ऊर्जा विभागाच्या कामकाजाचा आढावा घेण्यासाठी एक महत्त्वपूर्ण बैठक घेतली.

या बैठकीदरम्यान राज्यमंत्री बोर्डीकर यांनी स्पष्ट शब्दांत नाराजी व्यक्त करत, संबंधित अधिकाऱ्यांना आणि विभागाच्या प्रतिनिधींना चांगलेच धारेवर धरले. त्यांनी सांगितले की, "कामे वेळेवर पूर्ण न करणाऱ्या व दर्जा न राखणाऱ्या ठेकेदारांवर तातडीने कारवाई करावी. असे ठेकेदार राज्य शासनाच्या विकास प्रक्रियेला अडथळा ठरत आहेत आणि जनतेच्या अपेक्षा पूर्ण करण्यात अपयशी ठरत आहेत."

राज्यमंत्री बोर्डीकर यांनी यावेळी पुढील महत्वाचे मुद्दे अधोरेखित केले:

• निकृष्ट दर्जाच्या कामांची तत्काळ चौकशी करावी.
• दोषी ठेकेदारांवर आर्थिक दंड तसेच इतर कायदेशीर कारवाई करण्यात यावी.
• वेळेत व गुणवत्तापूर्ण कामे करणाऱ्या ठेकेदारांना प्रोत्साहन देण्यात यावे.
• निकृष्ट काम करणाऱ्या ठेकेदारांना ‘ब्लॅकलिस्ट’ करण्याची प्रक्रिया तात्काळ सुरू करावी.

बैठकीत उपस्थित असलेल्या विभागीय अधिकाऱ्यांनी त्यांच्या बाजूने काही स्पष्टीकरणे दिली असली तरी मंत्री महोदया यांनी स्पष्टपणे सांगितले की, "सर्वसामान्य नागरिकांना अंधारात ठेवणे परवडणारे नाही. ऊर्जा हे मूलभूत अधिकारांपैकी एक आहे आणि त्यात कुठलाही हलगर्जीपणा खपवून घेतला जाणार नाही."

बीड जिल्ह्यातील ग्रामीण भागांमध्ये अजूनही अनेक ठिकाणी विजेची अडचण जाणवत आहे. नवीन ट्रान्सफॉर्मर्सची उभारणी, खांबांची बसवणी, तारा बदलणे आदी कामे अनेक ठिकाणी रखडली आहेत. या कामांची गुणवत्ता आणि वेळेवर पूर्तता ही प्रमुख समस्या ठरत आहे.

राज्यमंत्री मेघना बोर्डीकर यांच्या या ठाम भूमिकेमुळे बीड जिल्ह्यातील ऊर्जा विभागातील गोंधळ थांबेल आणि स्थानिक जनतेला दिलासा मिळेल, अशी अपेक्षा व्यक्त केली जात आहे.