दहा हजाराचे पाच लाख देण्यासाठी सावकाराचा तगादा ....

परळीत खाजगी सावकाराच्या जाचाला कंटाळून शेतमजूराची आत्महत्या

परळी वैजनाथ  - आर्थिक अडचणींना कंटाळून आणि सावकाराच्या धमक्यांमुळे एका शेतमजूराने विष घेऊन आपले जीवन संपवल्याची धक्कादायक घटना परळीत घडली आहे. मयत शेतमजूराचे नाव देविदास एकनाथराव शिंदे, वय 55 वर्षे, रा. कृष्णा नगर, परळी असे आहे.केवळ दहा हजार रुपये उधार घेतले होते पण खाजगी सावकार त्यावर पाच लाख रुपये फेड करण्यासाठी तगादा लावत होता. एवढंच नव्हे, तर पैसे नाही दिले तर शेती नावावर करून घेईन अशी थेट धमकी देत होता.या प्रकरणी संभाजीनगर पोलीस ठाण्यात दोघांविरुद्ध गुन्हा दाखल करण्यात आला असून, त्यापैकी एक आरोपीला पोलिसांनी ताब्यात घेतले आहे.

दहा हजाराचे पाच लाख देण्यासाठी सावकाराचा तगादा 

 खाजगी सावकाराकडुन हात उसणे घेतलेले दहा हजार रुपये परत केले तरी त्या दहा हजार रुपयांचे व्याज पाच लाख रुपये झाले असल्याचे सांगत त्यासाठी तुझी जमीन आमच्या नावावर कर म्हणत मारहाण करुन दिलेल्या त्रासाला कंटाळुन ५५ वर्षीय शेतकर्याने विष प्राशन करुन आत्महत्या केल्याची घटना दि.४ ऑक्टोबर रोजी घडली.याप्रकरणी खाजगी सावकारकी करणार्या दोघांविरुद्ध संभाजीनगर पोलिस ठाण्यात गुन्हा दाखल करण्यात आला असुन पोलिसांनी एकास अटक केली आहे 

 परळी शहरातील कृष्णा नगर भागातील रहिवासी देविदास शिंदे यांचे लोणी ता.परळी येथे अडीच एकर जमीन असुन ते आपल्या कुटुंबासह परळीतील कृष्णानगर भागात रहात होते.गतवर्षी त्यांनी भारत विक्रम गायकवाड व अशोक विक्रम गायकवाड यांच्याकडुन दहा हजार रुपये व्याजाने घेतले होते.त्याचे सर्व मुद्दल मुलगा कृष्णा याच्या फोन पे वरुन परत केलेले असताना गायकवाड यांनी आपण दिलेल्या दहा हजार रुपयांचे व्याज बाकी असुन ते पाच लाख रुपये झाले आहे.ते पैसे देण्यासाठी शिंदे यांना तुमची जमीन आमच्या नावे करा असा तगादा लावत त्यांचे कागदपत्रे घेवुन मारहाण केली.देविदास शिंदे हे परळी शहरातील अनंतपुरे यांच्याकडे सालगडी म्हणुन काम करत असल्याने एवढे पैसे देण्याची परिस्थिती नसल्याचे सांगुनही सतत त्रास देणे सुरु केले.या त्रासाला कंटाळुन देविदास शिंदे यांनी अनंतपुरे यांच्या शेतात विष प्राशन केले.त्यांना परळी उपजिल्हा व त्यानंतर अंबाजोगाई स्वामी रामानंद तीर्थ रुग्णालयात हलविण्यात आले परंतु दि.४ ऑक्टोबर रोजी डॉक्टरांनी त्यांना मृत घोषीत केले.याबाबत मयत देविदास शिंदे यांचा मुलगा कृष्णा शिंदे याच्या फिर्यादीवरून भारत विक्रम गायकवाड व अशोक विक्रम गायकवाड या दोघांविरुद्ध संभाजीनगर पोलिस ठाण्यात गुन्हा दाखल करण्यात आला आहे.पोलिसांनी अशोक गायकवाड यास अटक करत न्यायालयापुढे हजर केले असता त्यास दोन दिवसांची पोलीस कोठडी सुनावली आहे तर भारत गायकवाड हा अद्याप फरार आहे.