शेतकऱ्याचे घामाचे पीक, चोरट्यांच्या हाती;३७ क्विंटल सोयाबीनवर रातोरात डल्ला!
करम येथे घडली घटना; १ लाख 59 हजार रु.सोयाबीन चोरी
परळी/सोनपेठ, (प्रतिनिधी):- शेतकऱ्याच्या घामाच्या पाण्याने पिकवलेल्या सोयाबीनवर चोरट्यांनी डल्ला मारत तब्बल ३७ क्विंटल सोयाबीन लंपास केल्याची धक्कादायक घटना करम शिवारात उघडकीस आली आहे. या चोरीमुळे परिसरात एकच खळबळ उडाली असून शेतकरी वर्गात तीव्र संताप व्यक्त होत आहे. याप्रकरणी सोनपेठ पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे. या प्रकरणाचा पुढील तपास पोलीस निरीक्षक अशोक गित्ते यांच्या मार्गदर्शनाखाली सोनपेठ पोलीस करीत आहेत.
याबाबत मिळालेल्या माहितीनुसार, शुभम आत्माराम धुमाळ (वय ३१, रा. शंकर पार्वतीनगर, परळी वैजिनाथ, जि. बीड) हे शेतकरी आपल्या करम येथील गट क्र. ७२ क आणि १०१ ब मधील दोन हेक्टर शेतजमिनीत शेती व्यवसाय करतात. त्यांनी यावर्षी सोयाबीनचे पीक घेतले होते. दि. ३० ऑक्टोबर २०२५ रोजी त्यांनी पिकाची मळणी करून, त्यातील ११५ पोती सोयाबीन आपल्या चुलते शरद दगडोबा धुमाळ यांच्या आखाड्यावर ३१ ऑक्टोबर रोजी साठवून ठेवली होती. परंतु, ९ नोव्हेंबर २०२५ रोजी सकाळी त्यांच्या चुलत्यांच्या गडीने पाहणी केली असता अनेक पोती गायब असल्याचे लक्षात आले. त्याने तत्काळ ही माहिती धुमाळ कुटुंबीयांना दिली. शुभम धुमाळ यांनी घटनास्थळी जाऊन पाहणी केली असता ११५ पैकी ६२ पोती, प्रत्येकी अंदाजे ६० किलो वजनाची, चोरीस गेलेली आढळली. चोरीस गेलेल्या सोयाबीनच्या पोत्यांवर Jarandeshwar Sugar Mills Pvt. Ltd. – WHITE CRYSTAL SUGAR DOUBLE SULPHITATION" अशी छपाई होती. एकूण ३७ क्विंटल वजनाचे सोयाबीन, ज्याची बाजारभावानुसार किंमत प्रत्येकी क्विंटल ४३०० रुपये, असा एकूण १,५९,१०० रुपयांचा माल अज्ञात चोरट्यांनी चोरून नेला आहे. ही घटना दि. ८ नोव्हेंबरच्या रात्री ११.०० वाजल्यापासून ते ९ नोव्हेंबरच्या सकाळी ७.०० वाजेपर्यंत घडल्याचा अंदाज आहे. घटनेची माहिती मिळताच सोनपेठ पोलिस ठाण्यात शुभम धुमाळ यांनी फिर्याद दाखल केली असून, पोलिसांनी अज्ञात चोरट्यांविरुद्ध गुन्हा नोंदवून तपास सुरू केला आहे. या चोरीमुळे शेतकऱ्याचे मोठे आर्थिक नुकसान झाले असून, परिसरातील शेतकऱ्यांमध्ये चिंता व संतापाचे वातावरण आहे. अन्नदात्यांच्या कष्टाचे पीक अशा प्रकारे चोरीस जाणे म्हणजे ग्रामीण भागातील सुरक्षेवर प्रश्नचिन्ह उभे करते, अशी प्रतिक्रिया स्थानिक शेतकऱ्यांकडून व्यक्त केली जात आहे.
दरम्यान, पोलीस निरीक्षक अशोक रावसाहेब गित्ते यांच्या मार्गदर्शनाखाली तपास सुरू असून, आसपासच्या सीसीटीव्ही फुटेजसह संशयितांचा शोध घेण्याचे प्रयत्न सुरू आहेत.
टिप्पण्या
टिप्पणी पोस्ट करा