नवमतदारासाठी अविस्मरणीय क्षण....

विलक्षण योगायोग : जीवनातील मतदानाचा पहिल्यांदाच बजावला हक्क- तोही स्वतःच्या आईलाच मतदान करण्याची मिळाली संधी

परळी वैजनाथ , प्रतिनिधी....

    निवडणुकीसाठी अठरा वर्ष पूर्ण केल्यानंतर पहिल्यांदाच प्रत्यक्ष मतदान करण्याची संधी प्रत्येकाच्या आयुष्यात येत असते. पहिल्या मतदानाचा हक्क बजावताना ची प्रत्येकाची भावना ही विलक्षणच असते. मात्र जीवनातील मतदान करण्याची पहिलीच वेळ आणि त्याच वेळेला आपले पहिले मतदान आपल्या जन्मदात्या आईलाच करण्याचे भाग्य लाभण्याची संधी परळीतील नवमतदार चि.आद्य बाजीराव धर्माधिकारी याला मिळाली आहे. हा एक विलक्षण योगायोग घडून आला आहे.

             परळी वैजनाथ नगर परिषदेच्या सार्वत्रिक निवडणुकीसाठी आज दोन डिसेंबर रोजी मतदान प्रक्रिया पार पडली. या नगरपरिषद निवडणुकीत राष्ट्रवादी काँग्रेस व महायुतीकडून नगराध्यक्ष पदासाठी सौ पद्मश्रीताई बाजीराव धर्माधिकारी यांनी निवडणूक लढवली आहे. जनतेतून नगराध्यक्ष पदाची निवड असल्याने तमाम परळीकरांमधून नगराध्यक्षपदासाठी उमेदवार निवडला जाणार आहे. याचवेळी सौ. पद्मश्रीताई बाजीराव धर्माधिकारी यांचा मुलगा चि. आद्य बाजीराव धर्माधिकारी याला जीवनातील पहिलेच मतदान करण्याची संधी प्राप्त झाली आहे या निवडणुकीत नवमतदार असलेल्या चि. आद्यला जीवनातील पहिले मतदान करण्याची संधी तर मिळालीच परंतु  विलक्षण योगायोग असा की, या नव मतदार युवकाला आपले पहिले मतदान करायचे आणि तेही स्वतःच्या जन्मदात्या आईलाच मतदान करण्याची संधी या निमित्ताने प्राप्त झाली. परळीच्या निवडणुकीत हा एक आत्मीय व अविस्मरणीय क्षण बघायला मिळाला आहे.

दरम्यान, आपल्या जीवनातील पहिलेच मतदान हे माझ्या आईसाठी मला देता येत आहे. ही माझ्यासाठी जीवनातील सर्वात मोठी अविस्मरणीय आणि हृदयात घट्ट बसणारी घटना असणार आहे. नव मतदार म्हणून मी तर माझ्या आईला माझे पहिले मतदान दिलेच आहे. त्याच पद्धतीने सर्व नवमतदार ,युवकांचाही भरभरून आशीर्वाद नगराध्यक्ष पदासाठी माझ्या आईच्या व सर्व महायुतीच्या उमेदवारांच्या पाठीशी निश्चितच असणार आहे अशी भावना चि.आद्य याने यावेळी व्यक्त केली.