संतापजनक घटना

 श्री.काळभैरव देवस्थान यात्रेला उत्साहपूर्ण सुरुवात 

आज पालखी सोहळा , काल्याचे कीर्तन व महाप्रसादचा लाभ घ्यावा 

मांडवा (परळी वैजनाथ) प्रतिनिधी :- श्री काळभैरव देवस्थान मांडवा यात्रेचा शुभारंभ 27 नोव्हेंबर रोजी भक्तिमय वातावरणात झाला. या यात्रेनिमित्त सात दिवसांच्या भव्य कथेचे आयोजन करण्यात आले होते. नामवंत कीर्तनकारांनी दररोज उपस्थित राहून भागवत कथा,कीर्तन, प्रवचन आणि भक्तिसंगीताचा आनंद भक्तांना दिला. सात दिवस चाललेल्या या धार्मिक कार्यक्रमांना गावकऱ्यांनी उत्स्फूर्त प्रतिसाद देत अन्नदान व दानधर्मातही सहभागी होऊन परंपरा जपली.

उद्या पासून मार्गशीर्ष पौर्णिमे निमित्त श्री काळभैरव देवस्थानचा मुख्य यात्रा उत्सव पार पडणार आहे. यानिमित्त देवाची महापूजा, शृंगार आरती, महाप्रसाद असे धार्मिक विधी होणार असून पालखीची भव्य मिरवणूक गावभरातून निघणार आहे. संपूर्ण गावात उत्सवाचे वातावरण निर्माण झाले आहे.

आज ह.भ.प.रामायणाचार्य रामेश्वर महाराज महाजन यांचे दुपारी १ ते ३ काल्याचे कीर्तन होईल व महाप्रसाद आयोजन केले आहे मंदिरावर आकर्षक विद्युत रोषणाई करण्यात आली आहे या विद्युत रोषणाईने परिसर उजळून निघाला आहे .

यात्रेचे आणखी एक आकर्षण म्हणजे 5 डिसेंबर रोजी आयोजित भव्य कुस्ती दंगल. या दंगलींमध्ये नामवंत मल्ल व पैलवान हजेरी लावून कुस्तीची शान वाढवणार आहेत. हजारो प्रेक्षक या दंगलींचा प्रत्यक्ष आनंद घेण्यासाठी उपस्थित राहतील अशी अपेक्षा आहे.

यात्रेनिमित्त आंध्र प्रदेश , तेलंगणा, कर्नाटक येथील मथुरालाभण समाजाचे भक्त मोठ्या संख्येने भाविक दर्शनासाठी मांडव्यात दाखल झाले आहेत. अनेक भक्त दोन दिवस मुक्कामी राहून पूजा-अर्चा आणि धार्मिक कार्यक्रमांचा लाभ घेतात . तसेच मांडवा व परळी पंचक्रोशीतील भाविक भक्त मोठ्या संख्येने दर्शनासाठी उपस्थित राहात असून यात्रेला मोठी गर्दी होत आहे. श्री काळभैरव देवस्थान यात्रा मांडवा गावाच्या सांस्कृतिक आणि धार्मिक परंपरेचे दर्शन घडविणारी ठरत आहे.