ज्येष्ठ एक नव्हे, तर दोन महिने,.....मराठी पंचांगात अधिक मास का येतो, जाणून घ्या.....

 शनिअमावस्येनिमित्त राक्षसभुवन दुमदुमले; एक लाख भाविकांनी घेतले दर्शन

गेवराई : राक्षसभुवन शनी महाराज देवस्थान येथे शनिअमावस्येनिमित्त शनिभक्तांची अभूतपूर्व गर्दी पाहायला मिळाली. राज्यातील विविध जिल्ह्यांसह परराज्यातून आलेल्या सुमारे एक लाख भाविकांनी दिवसभरात शनी महाराजांचे दर्शन घेतल्याची माहिती देवस्थान ट्रस्टचे अध्यक्ष भगवान पुराणिक यांनी दिली.

शनिअमावस्येनिमित्त पहाटेपासूनच मंदिर परिसरात भाविकांच्या रांगा लागण्यास सुरुवात झाली होती. “जय शनीदेव”च्या जयघोषाने संपूर्ण परिसर भक्तिमय वातावरणात न्हाऊन निघाला होता. अनेक भाविकांनी तेल अभिषेक, पूजा-अर्चा, नवसपूर्ती तसेच विविध धार्मिक विधी करून शनी महाराजांचे दर्शन घेतले. मंदिर परिसरात दिवसभर भक्तांची मोठी वर्दळ कायम होती.

यंदा तीव्र उष्णतेची लाट आणि कडक उन्हाळा असूनही भाविकांची श्रद्धा कायम असल्याचे चित्र पाहायला मिळाले. उन्हाचा त्रास होऊ नये म्हणून देवस्थान ट्रस्टतर्फे सकाळी व सायंकाळच्या वेळेत दर्शनासाठी येण्याचे आवाहन यापूर्वीच करण्यात आले होते. विशेषतः लहान मुले, महिला आणि ज्येष्ठ नागरिकांनी काळजी घ्यावी, असे आवाहन ट्रस्टकडून करण्यात आले होते.

भाविकांच्या सोयीसाठी देवस्थान ट्रस्टतर्फे पिण्याच्या थंड पाण्याची व्यवस्था, सावलीसाठी मंडप, वाहन पार्किंग तसेच दर्शन रांगांचे नियोजन करण्यात आले होते. मंदिर परिसरात स्वयंसेवक कार्यरत ठेवण्यात आले होते. तसेच कोणताही अनुचित प्रकार घडू नये यासाठी पोलीस प्रशासनाकडून चोख बंदोबस्त ठेवण्यात आला होता.

शनिअमावस्येनिमित्त राक्षसभुवन येथे भरलेल्या यात्रेमुळे परिसरातील व्यापाऱ्यांमध्येही उत्साहाचे वातावरण पाहायला मिळाले. फळे, पूजेचे साहित्य, प्रसाद तसेच खाद्यपदार्थांच्या दुकानांवर मोठी गर्दी झाली होती. दिवसभर भाविकांच्या गर्दीमुळे राक्षसभुवन परिसर पूर्णपणे दुमदुमून गेला होता.