MB NEWS-दौऱ्यात भेटायला येणारांना खा. सुप्रिया सुळे यांनी केले 'हे' आवाहन

दौऱ्यात भेटायला येणारांना खा. सुप्रिया सुळे यांनी केले 'हे' आवाहन

परळी वैजनाथ, प्रतिनिधी....

राष्ट्रवादी काँग्रेसच्या नेत्या खा.सुप्रिया सुळे सध्या राज्यात विविध ठिकाणी दौरा करत आहेत.या दौऱ्यात ठिकठिकाणी पदाधिकारी, कार्यकर्ते, मोठ्या संख्येने त्यांना भेटायला व स्वागताला येत आहेत.दरम्यान आपल्याला भेटायला येणारांना खा.सुप्रिया सुळे यांनी महत्त्वपूर्ण आवाहन केले आहे.काही वेळापुर्वीच एक ट्विट करत त्यांनी हे आवाहन केले आहे.

खा.सुप्रिया सुळे यांनी ट्विटरवर आवाहन करतांना म्हटले आहे की, राज्याच्या दौऱ्यावर असताना भेटायला येणारे पदाधिकारी, कार्यकर्ते आणि नागरीक राष्ट्रवादी काँग्रेस व पवार कुटुंबियांवरील प्रेमापोटी विविध भेटवस्तू आणतात. यामध्ये पुष्पगुच्छ, हारतुरे, छायाचित्रे, फोटो फ्रेम आदींचा समावेश असतो. हे आपल्या प्रेमाचं प्रतिक आहे.आपल्या या निखळ भावना आणि प्रेमाबद्दल आम्ही सर्वजण कृतज्ञ आहोत. परंतु माझी आपणास नम्र विनंती आहे की, भेटवस्तू आणायच्या असतील तर कृपया त्या पुस्तकांच्या स्वरुपात आणाव्या. पुस्तकांमुळे खऱ्या अर्थाने ज्ञानाचा प्रसार होतो.आपण भेट दिलेली पुस्तके वाचनालयांमध्ये जातील याची आम्ही दक्षता घेऊ, याचा फायदा अनेक गरजू मुलामुलींना होऊन वाचनसंस्कृतीचा प्रचार व प्रसार होऊ शकेल. धन्यवाद..