परळीकरांनी केलं आत्मीय स्वागत....!!!

 उपजिल्हा रुग्णालय रस्त्यावरील वाहनांमुळे रुग्णवाहिकेस अडथळा -अश्विन मोगरकर 

परळी वैजनाथ...

    उपजिल्हा रुग्णालयात जाण्याच्या रस्त्यावर उभ्या केलेल्या कार, ऑटोरिक्षा मुळे रुग्णाला घेऊन आलेल्या रुग्णवाहिकेलाच आत जाण्यास अडथळा निर्माण होत असल्याने गंभीर रुग्णाच्या जीवावर बेतण्याची शक्यता आहे. बेजबाबदार वाहनचालक व गायब असलेले वाहतूक पोलीस यासाठी जबाबदार ठरवण्यात यावेत व त्यांच्यावर कार्यवाही करण्यात यावी अशी मागणी भाजपाचे अश्विन मोगरकर यांनी केली आहे.

राणी लक्ष्मीबाई टॉवर जवळ असणाऱ्या उपजिल्हा रुग्णालयात रुग्णांची कायम गर्दी असते.  जवळच स्टेट बँक ऑफ इंडिया, पोस्ट ऑफिस असल्याने या परिसरात कायम गर्दी असते. बँकेत, पोस्टात जाणारे अनेक ग्राहक रस्त्यावर बेशिस्तपणे वाहन लावत असतात. त्यामुळे येथे वाहतूक कोंडी ही कायमची डोकेदुखी झाली आहे. बुधवार दि 9 एप्रिल रोजी दुपारी दोनच्या सुमारास एक रुग्णवाहिका रुग्णास घेऊन उपजिल्हा रुग्णालयात आलेली असताना रुग्णालयात जाण्याच्या वाटेत एक कार व ऑटोरिक्षा उभी असल्याने रुग्णवाहिकेस दवाखान्यात लवकर जाता आले नाही. उपस्थित नागरिकांनी रिक्षा बाजूला करून रुग्णवाहिकेस आत जाण्यास वाट करून दिली. 

उपजिल्हा रुग्णालयाच्या दारात कायम वाहने उभी रहात असल्याने गंभीर रुग्णाच्या बाबतीत वाईट घटना घडण्याची शक्यता आहे. या रोडवर वारंवार वाहतूक कोंडी होत असते. या महत्वाच्या रोडवर वाहतूक पोलिसांची नियुक्ती करावी अशी मागणी होत असते. शहरातील या महत्वाच्या रस्त्यावर वाहतूक पोलिसांची नियुक्ती करण्यात यावी व बेजबाबदार पणे वाहने रस्त्यावर लावणाऱ्या वाहनचालकांवर कार्यवाही करण्यात यावी अशी मागणी भाजपाचे अश्विन मोगरकर यांनी केली आहे.