परळीच्या भूमिपुत्राचा छत्रपती संभाजीनगर येथे गौरव
योग प्रशिक्षक पोलिस हवालदार सचिन डाके यांचा प्रशंसापत्र, शाल व श्रीफळ देऊन गौरव
परळी वैजनाथ (प्रतिनिधी):- आंतरराष्ट्रीय योग दिनानिमित्त 21 जून रोजी राज्य राखीव पोलीस बल गट क्रमांक 14, छत्रपती संभाजीनगर येथील मुख्यालयाच्या मैदानावर भव्य योग व प्राणायाम कार्यक्रमाचे आयोजन करण्यात आले होते. या कार्यक्रमात परळी वैजनाथचे भूमिपुत्र तथा योग प्रशिक्षक पोलिस हवालदार सचिन डाके यांनी योग आणि प्राणायामाचे महत्त्व, त्यांचे आरोग्यदायी फायदे तसेच दैनंदिन जीवनात योगाचे स्थान याविषयी सविस्तर मार्गदर्शन केले.
सचिन डाके यांनी उपस्थित पोलिस अधिकारी व कर्मचार्यांना विविध योगासने, प्राणायामाचे प्रकार आणि तणावमुक्त व निरोगी जीवनासाठी आवश्यक असलेल्या योगक्रिया प्रत्यक्ष करून दाखवल्या. त्यांच्या मार्गदर्शनाखाली उपस्थित सर्वांनी उत्स्फूर्तपणे योग व प्राणायामाचा सराव केला.
या कार्यक्रमास राज्य राखीव पोलीस बल गट क्रमांक 14 च्या समादेशक श्रीमती कविता नेरकर-पवार, सहायक समादेशक श्री. किसन येमुरे, समादेशक सहायक श्री. अकबर शेख, तसेच पोलीस निरीक्षक, पोलीस उपनिरीक्षक व मोठ्या संख्येने पोलीस अमलदार उपस्थित होते. समादेशक श्रीमती कविता नेरकर-पवार यांनी स्वतः योग व प्राणायामामध्ये सहभाग घेत योगाचे महत्त्व अधोरेखित केले.
पोलिस दलातील अधिकारी व कर्मचार्यांचे आरोग्य सुदृढ ठेवण्यासाठी आणि त्यांच्या कार्यक्षमतेत वाढ करण्यासाठी सचिन डाके यांनी केलेले योगदान उल्लेखनीय असल्याचे मान्यवरांनी नमूद केले. योग क्षेत्रातील त्यांच्या उत्कृष्ट कार्याची दखल घेत राज्य राखीव पोलीस दलाच्या वतीने त्यांचा प्रशंसापत्र, शाल व श्रीफळ देऊन सन्मानपूर्वक सत्कार करण्यात आला.
यावेळी उपस्थित अधिकार्यांनी सचिन डाके यांच्या योग प्रसाराच्या कार्याचे विशेष कौतुक केले. पोलिस दलामध्ये आरोग्यदायी जीवनशैली रुजविण्यासाठी तसेच समाजात योगाबाबत जनजागृती करण्यासाठी त्यांनी सातत्याने केलेले कार्य प्रेरणादायी असल्याचे मत व्यक्त करण्यात आले.
परळी वैजनाथच्या या भूमिपुत्राने राज्य राखीव पोलीस बलासारख्या महत्त्वाच्या विभागात योग प्रशिक्षण देऊन परळीच्या नावाचा गौरव वाढविला आहे. त्यांच्या या यशाबद्दल परळी शहरासह जिल्हाभरातून अभिनंदनाचा वर्षाव होत असून, योग क्षेत्रातील त्यांची वाटचाल अनेकांसाठी प्रेरणादायी ठरत आहे. **
टिप्पण्या
टिप्पणी पोस्ट करा