संघर्षातून यशाकडे: भांडी-धुणी करणाऱ्या माऊलीच्या लेकीची १२ वीच्या परीक्षेत मोठी झेप!
परळी वैजनाथ,प्रतिनिधी...
आईने दुसऱ्यांच्या घरी भांडी-धुणी करून काबाडकष्ट केले आणि मुलीनेही त्या कष्टाचे चीज करत १२ वीच्या परीक्षेत तब्बल ७८% गुण मिळवून घवघवीत यश संपादन केले आहे. परिस्थिती बेताची असली तरी जिद्द आणि मेहनतीच्या जोरावर मिळवलेल्या तनुजा रणदिवे या मुलीच्या यशाचे सर्वत्र कौतुक होत आहे.
तनुजा ची आई पद्मिन तानाजी रणदिवे गेल्या अनेक वर्षांपासून गणेशपार भागात धुणी-भांडी करून कुटुंबाचा उदरनिर्वाह करत आहे. पतीच्या निधनानंतर व आर्थिक स्थिती हलाखीची असताना घराची संपूर्ण जबाबदारी आईच्या खांद्यावर होती. "माझ्या वाट्याला आलेले कष्ट माझ्या मुलीच्या वाट्याला येऊ नयेत," याच एका ध्येयाने या माऊलीने दिवसरात्र काम केले. परळी येथे हनुमान नगर येथे किरायाच्या घरात राहणाऱ्या व घरात अभ्यासासाठी वेगळी खोली नाही की महागडे क्लास लावण्याची सोय नव्हती. आई कामावर गेल्यावर घरची कामे आटपून ही मुलगी अभ्यासाला बसायची. रात्री उशिरा पर्यंत तिने चिकाटीने अभ्यास केला. कष्टाचे मोल जाणणाऱ्या तनुजाने अभ्यासात कधीही कसर सोडली नाही.
नुकत्याच जाहीर झालेल्या १२ वीच्या निकालात तिने कला शाखेतून ७८% गुण मिळवून सर्वांनाच थक्क केले. निकालाचे वृत्त समजताच आईच्या डोळ्यांत आनंदाश्रू उभे राहिले. "माझ्या मुलीने माझ्या कष्टाचं सोनं केलं," अशी भावना तिने व्यक्त केली.
तनुजा च्या यशानंतर आता तिला उच्च शिक्षण घेऊन स्वतःच्या पायावर उभे राहायचे आहे. प्रतिकूल परिस्थितीवर मात करून मिळवलेले हे यश अनेक विद्यार्थ्यांसाठी प्रेरणादायी ठरत आहे.
टिप्पण्या
टिप्पणी पोस्ट करा