परळीत दैनिक न्याय टाइम्सचा वर्धापन दिन उत्साहात

थारचा थरार: प्रशांत देशमुख या युवकाला चिरडले -  उच्चस्तरीय चौकशी करून कारवाई करा सकल मराठा समाजाची मागणी

परळी वैजनाथ प्रतिनिधी :

परळी शहरातील गजबजलेल्या आणि उच्चभ्रू वस्तीमध्ये शुक्रवारी सायंकाळी सुमारे पाच वाजण्याच्या दरम्यान एक भीषण अपघात घडला. भरधाव वेगाने येणाऱ्या काळ्या रंगाच्या थार चारचाकी वाहनाने पार्सल सेवा देणारे युवक प्रशांत प्रल्हादराव देशमुख यांना जोरदार धडक दिली. या धडकेत ते गंभीर जखमी झाले.

घटनास्थळी उपस्थित नागरिकांनी तत्काळ जखमी अवस्थेतील प्रशांत देशमुख यांना उपचारासाठी परळी येथील रुग्णालयात दाखल केले. प्रकृती गंभीर असल्याने त्यांना पुढील उपचारासाठी अंबाजोगाई येथील स्वामी रामानंद तीर्थ वैद्यकीय महाविद्यालय व रुग्णालयात हलविण्यात आले. मात्र उपचार सुरू असताना त्यांची मृत्यूशी सुरू असलेली झुंज अपयशी ठरली आणि त्यांचा दुर्दैवी मृत्यू झाला.

या घटनेमुळे परळी शहरात हळहळ व्यक्त होत असून नागरिकांमध्ये संतापाचे वातावरण आहे. ज्या भागात अनेक शासकीय कार्यालये, निवासी वसाहती आणि बंगल्यांची वस्ती आहे, त्या भागात भरधाव वेगाने वाहन चालविण्यावर प्रश्नचिन्ह उपस्थित केले जात आहे.

दरम्यान, अपघाताची संपूर्ण घटना परिसरातील सीसीटीव्ही कॅमेऱ्यांमध्ये कैद झाल्याची माहिती समोर येत आहे. संबंधित थार वाहनचालकाविरुद्ध कठोर कारवाई करण्याची मागणी नागरिकांकडून होत आहे. या प्रकरणाचा पुढील तपास पोलीस करीत आहेत.

"एका निष्पाप युवकाचा जीव घेणाऱ्या बेदरकार वाहनचालकावर कठोर कारवाई व्हावी," अशी भावना नागरिकांकडून व्यक्त केली जात आहे.