संतापजनक: परळीत पुन्हा अमानवी कृत्य.....

 नांदेड विभागाची तिकीट तपासणीत विक्रमी कामगिरी; ₹14.95 कोटी महसूल

 परभणी (प्रतिनिधी) : दक्षिण मध्य रेल्वेच्या नांदेड विभागाने आर्थिक वर्ष 2025–26 मध्ये तिकीट तपासणी मोहिमेद्वारे आतापर्यंतची सर्वोत्तम कामगिरी नोंदवत ₹14.95 कोटी महसूल जमा केला आहे. मुख्यालयाने दिलेल्या ₹14.80 कोटींच्या उद्दिष्टापेक्षा अधिक महसूल मिळवत विभागाने हे लक्ष्य आर्थिक वर्ष संपण्याच्या तीन दिवस आधीच, म्हणजे 28 मार्च 2026 रोजी पूर्ण केले.

      मागील आर्थिक वर्ष 2024–25 मध्ये नोंदवलेल्या ₹12.59 कोटी महसुलाच्या तुलनेत यंदा लक्षणीय वाढ झाली असून, तिकीट तपासणी कार्यक्षमता अधिक बळकट झाल्याचे दिसून येते. विशेष तिकीट तपासणी मोहिमा, सातत्यपूर्ण देखरेख आणि काटेकोर नियोजन यामुळे ही कामगिरी शक्य झाली आहे.

     यंदाच्या वर्षात विभागाने काही महत्त्वाचे विक्रमही प्रस्थापित केले आहेत. 17 ऑक्टोबर 2025 रोजी एका दिवसात सर्वाधिक ₹10.90 लाख महसूल मिळविण्यात आला, तर ऑक्टोबर 2025 महिन्यात ₹1.55 कोटींची सर्वोत्तम मासिक कामगिरी नोंदवण्यात आली.

     विनातिकीट व अनियमित प्रवासावर प्रभावी नियंत्रण ठेवून रेल्वे महसूलाचे संरक्षण करण्यात तिकीट तपासणी कर्मचाऱ्यांचा मोठा वाटा असल्याचे स्पष्ट झाले आहे. त्यांच्या मेहनत, तत्परता आणि समर्पणामुळेच हा उल्लेखनीय टप्पा गाठता आला.

     विभागीय रेल्वे व्यवस्थापक प्रदीप कामले यांनी या यशाबद्दल वाणिज्य विभाग व तिकीट तपासणी कर्मचाऱ्यांचे अभिनंदन करत भारतीय रेल्वेच्या महसूल वाढीत दिलेल्या योगदानाचे कौतुक केले. तसेच, प्रवाशांमध्ये शिस्त वाढविणे व प्रामाणिक प्रवासाची संस्कृती रुजविण्यासाठी नांदेड विभाग पुढील काळातही कटिबद्ध राहणार असल्याचे त्यांनी सांगितले.