शेतातील विद्युत मोटारी आणि वायर चोरीच्या घटनांमध्ये वाढ....

पावसाने अडवलं... अन् चोरांनी लुबाडलं!

गोवर्धन शिवारातून बोरवेलची ५ एचपी मोटार व वायर चोरी; पिके वाचविण्याचाच आधार हिरावला

परळी वैजनाथ, प्रतिनिधी :

      परळी वैजनाथ तालुक्यातील गोवर्धन येथील ७५ वर्षीय शेतकरी अनंत रंगनाथ जाधव यांच्यावर दुहेरी संकट कोसळले आहे. एकीकडे पावसाने दडी मारल्याने पिकांना जगविण्यासाठी विहीर व बोरवेलच्या पाण्यावर अवलंबून राहण्याची वेळ आली असताना, दुसरीकडे अज्ञात चोरट्यांनी त्यांच्या शेतातील बोरवेलची ५ एचपीची मोटार आणि वीज वायर चोरी करून नेल्याने पिके वाचविण्याचाच आधार हिरावला गेला आहे.

        गोवर्धन शिवारातील 'चोपन' नावाच्या शेतातून जीके एनर्जी लिमिटेड कंपनीची ५ एचपीची मोटार व वीज वायर २३ ते २४ जूनच्या दरम्यान अज्ञात चोरट्यांनी लंपास केली. चोरीचा प्रकार लक्षात आल्यानंतर अनंत जाधव यांनी परिसरात सर्वत्र शोध घेतला, मात्र मोटार व वायरचा कोणताही मागमूस लागला नाही.अखेर २ जुलै रोजी त्यांनी सिरसाळा पोलीस ठाण्यात अज्ञात चोरट्यांविरुद्ध तक्रार दाखल केली. त्यानुसार गुन्हा रजिस्टर क्रमांक १९२/२०२६ अन्वये चोरीचा गुन्हा दाखल करण्यात आला आहे.

        यंदा पावसाने उशीर केल्याने पिकांना जिवंत ठेवण्यासाठी शेतकऱ्यांना बोरवेल व विहिरीतील पाण्यावरच अवलंबून राहावे लागत आहे. अशा परिस्थितीत सिंचनासाठी अत्यावश्यक असलेली मोटार आणि वायर चोरीला गेल्याने जाधव यांच्यासमोर पिके वाचविण्याचे मोठे संकट उभे राहिले आहे. नैसर्गिक संकटाशी झुंज देत असलेल्या शेतकऱ्याला आता चोरट्यांच्या कृत्यामुळे आर्थिक फटका आणि मानसिक त्रासालाही सामोरे जावे लागत आहे.

या प्रकरणाचा पुढील तपास सिरसाळा पोलीस ठाण्याचे पोलीस हेडकॉन्स्टेबल देवकते करीत आहेत. दरम्यान, ग्रामीण भागात शेतातील विद्युत मोटारी आणि वायर चोरीच्या घटनांमध्ये वाढ होत असल्याने शेतकऱ्यांमध्ये भीतीचे वातावरण निर्माण झाले असून, अशा चोरट्यांवर कठोर कारवाई करण्याची मागणी होत आहे.