MB NEWS:परळी शहरच्या तत्पर डिबी पथकाची दमदार कामगिरी: १२ तासाच्या आत २५ लाखांची बॅग लंपास करणाऱ्या आरोपीला शोधून ठोकल्या बेड्या

 परळी शहरच्या तत्पर डिबी पथकाची दमदार कामगिरी: १२ तासाच्या आत २५ लाखांची बॅग लंपास करणाऱ्या आरोपीला शोधून ठोकल्या बेड्या

परळी वैजनाथ, प्रतिनिधी ...

     परळी शहर पोलिस ठाण्याच्या तत्पर डिबी पथकाने दमदार कामगिरी बजावली असून काल परळीच्या मोंढा परिसरात घडलेल्या खळबळजनक घटनेचा उलगडा करण्यात यश मिळवले आहे. डिबी पथकाने१२ तासाच्या आत २५ लाखांची बॅग लंपास करणाऱ्या आरोपीला शोधून बेड्या ठोकल्या आहेत. परळी पोलिसांनी केलेली ही कामगिरी कौतुकास्पद आहे.

   औरंगाबादच्या व्यापार्‍याने वसुली करून आणलेले २५ लाख रुपये चारचाकी गाडीमध्ये ठेवले होते. अन्य वसुली करण्यासाठी ते गेले होते. गाडीत चालक होता मात्र चालकाने पैसे सोबत न नेता पैसे गाडीत ठेवून तो समोसे आणण्यासाठी गेला. तितक्यात चोरट्यांनी गाडीतील २५ लाख रुपये लांबविले. संजय गंगावले हे औरंगाबादचे व्यापारी अंबाजोगाईहून परळीला वसुलीसाठी आले होते. आतापर्यंतचे वसुलीचे पैसे जवळपास २५ लाख रुपये त्यांनी गाडीमध्ये ठेवले आणि इतर ठिकाणची वसुली करण्यासाठी ते परळी शहरामध्ये गेले होते. गाडीत चालक होता. चालक पैसे गाडीत ठेवून समोसे आण्यासाठी गेला. तितक्यात चोरट्यांनी डाव साधत गाडीतील २५ लाख रुपये पळविले. परत आल्यानंतर पैसे चोरीला गेल्याचे निदर्शनास आल्यानंतर याची माहिती परळी पोलिसांना देण्यात आली. त्यानुसार पोलिसांनी घटनास्थळी धाव घेऊन पंचनामा केला. या प्रकरणी अज्ञात चोरट्यांविरोधात गुन्हा दाखल करण्यात आला. 

    या घटनेमुळे व्यापारपेठेत मोठी खळबळ उडाली होती.परळी शहर पोलिसांनी गांभीर्याने ही बाब लक्षात घेऊन शोध सुरू केला.परळी शहर पोलिस ठाण्याच्या डिबी पथकाने तातडीने तपासकार्यात अग्रेसर होऊन आरोपींचा मागमुस शोधला.गुप्त माहिती अधारे आरोपी शोधून वैजापूर जि.औरंगाबाद येथून दोन आरोपी,२४ लाख ८ हजार रोख रक्कम व एक स्विफ्ट कार असा मुद्देमाल पोलिसांनी जप्त केला आहे.

     पोलीस अधिक्षक आर.राजा, उपविभागीय पोलिस अधिकारी जायभाये, पोलीस निरीक्षक हेमंत कदम यांच्या मार्गदर्शनाखाली डिबी पथकाचे भास्कर केंद्रे, सुंदर केंद्रे, गोविंद भताने, शंकर बुट्टे, आदींनी ही कौतुकास्पद कामगिरी बजावली आहे.पोलीसांच्या या कामगिरीचे कौतुक होत आहे.