दुःखद वार्ता....

 परळी शहर पोलीस ठाण्याचे वाहतूक पोलीस कर्मचारी श्रीकांत राठोड यांचे निधन

परळी वैद्यनाथ

परळी शहर पोलीस ठाण्यात वाहतूक शाखेत कार्यरत असणारे पोलीस कर्मचारी श्रीकांत छोटूराम राठोड यांचे रक्ताच्या कर्करोगाने  दुःखद निधन झाले. दि. १७ सप्टेंबर २०२५  रोजी सकाळी ८ वा. छत्रपती संभाजीनगर येथील रुग्णालयात त्यांची प्राणज्योत  मालवली. मृत्यू समयी त्यांचे वय ३८ वर्षे होते. अतिशय तरुण वयात राठोड यांचा मृत्यू झाल्याने सर्वत्र हळहळ व्यक्त होत आहे. अतिशय मनमिळाऊ स्वभाव, हरहुन्नरी व्यक्तिमत्व असलेले श्रीकांत राठोड यांच्या निधनाने सर्वत्र शोककळा पसरली आहे.

      श्रीकांत छोटूराम राठोड हे बीड तालुक्यातील अंतरवन पिंपरीतांडा येथील रहिवासी होते. गेल्या दोन वर्षापासून परळी शहर पोलीस वाहतूक शाखेत ते कार्यरत होते. गेल्या काही महिन्यापासून रक्ताच्या कर्करोगाने ते त्रस्त होते. छत्रपती संभाजीनगर येथील रुग्णालयात उपचारा दरम्यान त्यांचे दुर्दैवी निधन झाले. श्रीकांत राठोड यांच्या पश्चात पत्नी, एक मुलगी, दोन मुले असा परिवार आहे. श्रीकांत राठोड यांच्या पार्थिव देहावर बीड तालुक्यातील  अंतरवन पिंपरी तांडा येथील स्मशानभूमीत सायं. ६ वा. शोकाकुल वातावरणात अंत्यसंस्कार करण्यात आले.

चटका लावणारा अंत

परळी शहर पोलीस ठाण्यात वाहतूक शाखेत गेल्या दोन वर्षापासून कार्यरत असलेले  पोलीस कर्मचारी श्रीकांत राठोड यांचे अतिशय अल्पावधीत वयाच्या ३८ व्या वर्षी आजाराने दुर्दैवी निधन झाले. यामुळे पोलीस खात्यासह, कुटुंबीय व मित्र परिवारावर एकच शोककळा पसरली आहे. प्रत्येकाच्या जीवाला चटका लागावा असा अंत झाल्याने सर्वत्र हळहळ व्यक्त होत आहे