मोठ्या संख्येने उपस्थित रहा....

इतर सणांप्रमाणेच मकर संक्रांतीलाही परळीतील महावितरणाचा ठरलेला नेहमीचा 'दांडी'या सुरुच !

सणासुदीत विजेचा अखंडित खोळंबा:नागरिकांतील संतापाच्या भावनांची कोणीतरी दखल घ्यावी!

परळी वैजनाथ (प्रतिनिधी)

         सध्या मकरसंक्रांत सणाची धामधूम सुरु आहे. शहरात विविध ठिकाणी महिलावर्गाची लगबग सुरु आहे. येणाऱ्या आठवडाभरात महिलांकडून हळदी कुंकू कार्यक्रमांचे आयोजन करण्यात येते. मात्र इतर सणांप्रमाणेच यावेळीही परळीतील महावितरणाचा ठरलेला नेहमीचा 'दांडी'या सुरुच आहे.दरवर्षीप्रमाणे याहीवर्षीही ऐन सणासुदीच्या काळात शहरात रात्रंदिवस विजेचा लपंडाव सुरू आहे. यामुळे नागरिकांमध्ये संतापाचे वातावरण निर्माण झाले आहे.

     महिलांचा महत्त्वाचा मकरसंक्रांत उत्सव सुरु आहे.यावेळी शहरातील नागरिक, महिला, युवक, युवती यांची सणाची लगबग सुरु आहे. येत्या काही दिवसांत रात्री उशिरापर्यंत महिला मंडळाची हळदी कुंकवासाठी रस्त्यावर मोठी वर्दळ व गर्दी राहणार आहे. मात्र  नेमक्या या धामधुमीत वीजवितरण कंपनीने मात्र दरवर्षीप्रमाणे याहीवर्षी आपली परंपरा सुरू ठेवली असून जसाही मकरसंक्रांतीचा माहोल सुरू झाला आहे तसे विजेचा लपंडावही सुरू झाला आहे.

     शहरातील पद्मावती गल्लीसह विविध भागातील वीजपुरवठा सुरळीत चालू ठेवावा. याठिकाणी असलेल्या त्रुटी दूर कराव्यात; अशी मागणी नागरिकांकडून केली जात आहे. वीजवितरण कंपनीच्या ढिसाळ कारभाराच्या विरोधात नागरिकांमध्ये संतापाचे वातावरण निर्माण झाले आहे. शहर व परिसरातील वीजपुरवठा सुरळीत करण्याची मागणी नागरिकांनी केली आहे.