'मुलगी शिकली-प्रगती झाली' : समाजाला अभिमान!

स्वकुळ साळी समाजातून पहिली कन्या झाली ‘सीए’ :  समाजाने केला गायत्री शिवगणचा गौरव 

परळी वैजनाथ, ः- परळीत आयोजित करण्यात आलेल्या भगवान श्री जिव्हेश्वर जन्मोत्सवाचे औचित्य साधून स्वकुळ साळी समाजाच्या वतीने साळी समाजातून पहिली तरूणी कु.गायत्री अनिता गोविंद शिवगण ‘सीए’ (चार्टर्ड अकाऊटंट) झाल्याबद्दल तिचा साळी समाजाच्या वतीने सौ.स्वाती विलासराव ताटे यांच्या हस्ते शाल, श्रीफळ, पुष्पगुच्छ देवून सत्कार करून गौरव करण्यात आला. याप्रसंगी गायत्रीला प्रोत्साहन म्हणून नितीन भंडारे यांच्या वतीने लॅपटॉप बॅग भेट देण्यात आली. यावेळी गायत्रीचे वडील गोविंद शिवगण, समाजाचे अध्यक्ष बालासाहेब बडकस, विलासराव ताटे, नितीन भंडारे, धनंजय आरबुने आदी समाज बांधव, महिला उपस्थित होत्या.

यावेळी गायत्रीने मनोगत व्यक्त करताना म्हटले की, माझ्या या यशात माझे गुरूजन, मार्गदर्शक, वडील, काका यांचे मनापासून आभार मानले तसेच समाजातील मुला-मुलींना ‘सीए’ होण्याची इच्छा असेल अशा मुलां-मुलींना व इच्छुकांना मी योग्य ते मार्गदर्शन करेल अशा शब्दात तिने आपल्या भावना व्यक्त करून तिचा सत्कार केल्याबद्दल साळी समाज बांधवांचे आभार मानले.