नियमित प्रशासकीय प्रक्रियेचाच भाग असल्याची बतावणी...

दारू आणि ‘कला केंद्रा’च्या नादात औषध विक्रेत्याचा मृत्यू; पाच मित्रांविरुद्ध गुन्हा

बीड, प्रतिनिधी : बीड जिल्ह्यातील केज तालुक्यातील साळेगाव येथील ३७ वर्षीय औषध विक्रेता सतीश भागवतराव मुंडे यांचा मित्रांकडून झालेल्या मारहाणीमध्ये मृत्यू झाल्याची धक्कादायक घटना उघडकीस आली आहे. या प्रकरणी धाराशिव जिल्ह्यातील येरमाळा पोलीस ठाण्यात पाच जणांविरुद्ध खुनाचा गुन्हा दाखल करण्यात आला आहे.

         मिळालेल्या माहितीनुसार, सतीश मुंडे हे १२ फेब्रुवारी रोजी मित्रांसोबत धाराशिव जिल्ह्यातील चोराखळी येथील ‘महाकाली कला केंद्रा’त कार्यक्रम पाहण्यासाठी गेले होते. ते शेख अजमोद्दीन ऊर्फ मुन्ना शेख जिलानी यांच्या स्विफ्ट डिझायर कारमधून रवाना झाले. प्रवासादरम्यान साळेगाव येथील बार तसेच कळंब व येरमाळा परिसरातील धाब्यावर दारूचे सेवन करण्यात आल्याचे समोर आले आहे.रात्री सुमारे १२.१५ वाजेपर्यंत ते कला केंद्रात होते. त्यानंतर १३ फेब्रुवारीच्या मध्यरात्री गावाकडे परतत असताना दुसऱ्या वाहनातील ओळखीच्या तरुणांनी गाडी अडवून जुन्या वादातून सतीश मुंडे यांना छाती व पोटात लाथाबुक्क्यांनी मारहाण केल्याचा आरोप आहे. या मारहाणीत त्यांचा मृत्यू झाल्याचे फिर्यादीत नमूद आहे.

        घटनेनंतर चालकाने सतीश मुंडे यांना रात्री सुमारे १ वाजता त्यांच्या घरी आणून ‘अत्याधिक मद्यपानामुळे बेशुद्ध पडले’ असल्याचे कुटुंबीयांना सांगितले. मात्र प्रतिसाद न मिळाल्याने नातेवाईकांनी त्यांना प्रथम केज येथील उपजिल्हा रुग्णालयात आणि त्यानंतर स्वामी रामानंद तीर्थ ग्रामीण रुग्णालय व वैद्यकीय महाविद्यालय येथे हलविले. तेथे वैद्यकीय अधिकाऱ्यांनी त्यांना मृत घोषित केले. या प्रकरणी सतीश मुंडे यांचे वडील भागवत बळीराम मुंडे यांच्या फिर्यादीवरून शेख अजमोद्दीन ऊर्फ मुन्ना शेख जिलानी, शेख शकील रौफ, संजय जनार्दन गित्ते आणि दत्ता बाबासाहेब तोंडे (सर्व रा. साळेगाव, ता. केज) यांच्याविरुद्ध भारतीय न्याय संहितेच्या कलम १०३, १९१(२), ११५(२) अन्वये खुनाचा गुन्हा (गु.र.नं. ३८/२०२६) दाखल करण्यात आला आहे. तपास पोलिस उपनिरीक्षक स्वप्नील भोजगुडे करीत आहेत.