गर्भवती महिला हेळसांड: उपचारातील हलगर्जी प्रकरणी गित्ते हाॅस्पिटल मधील सीसीटीव्ही फुटेज जप्त करण्याची मागणी
परळी वैजनाथ, प्रतिनिधी:
शहरातील गित्ते हाॅस्पिटल या खाजगी रुग्णालयात उपचारादरम्यान गर्भातील बाळाचा मृत्यू झाल्याच्या प्रकरणात आता पुरावे सुरक्षित ठेवण्याची मागणी पुढे आली आहे. तक्रारदाराने शहर पोलीस ठाण्यात निवेदन देऊन संबंधित रुग्णालय तसेच परिसरातील सीसीटीव्ही फुटेज आणि डीव्हीआर तात्काळ जप्त करून सुरक्षित ताब्यात घेण्याची मागणी केली आहे.
तक्रारदार वैजनाथ संभाजी मुंडे यांनी दिलेल्या निवेदनात म्हटले आहे की, त्यांच्या पत्नीवर उपचार करताना डाॅ.कल्पना सचिन गित्ते यांच्याविरुद्ध हलगर्जीपणा झाल्याचा आरोप यापूर्वीच लेखी तक्रार करुन करण्यात आला आहे. या प्रकरणात सत्य समोर येण्यासाठी रुग्णालयातील आणि परिसरातील सीसीटीव्ही फुटेज महत्त्वाचे ठरणार असल्याचे त्यांनी नमूद केले आहे.२३ एप्रिल ते २४ एप्रिलदरम्यान रुग्णालयातील केबिन, कॉरिडॉर तसेच बाहेरील परिसरातील सीसीटीव्ही फुटेज जप्त करण्यात यावे, अशी मागणी करण्यात आली आहे. तसेच रुग्णालया समोरील अण्णाभाऊ साठे चौकातील शासकीय व खासगी सीसीटीव्ही कॅमेऱ्यांचे फुटेजही तपासात समाविष्ट करावे, असे म्हटले आहे.
या फुटेजमधून रुग्णालयात नेमका घटनाक्रम काय घडला, डॉक्टरांनी रुग्णाची तपासणी कधी केली, नातेवाईक किती वेळ उपस्थित होते यासह अनेक बाबी स्पष्ट होण्यास मदत होईल, असा दावा तक्रारदाराने केला आहे. डिजिटल पुरावे नष्ट होण्याची शक्यता लक्षात घेता तातडीने कारवाई करण्याची मागणीही करण्यात आली आहे..दरम्यान, या प्रकरणामुळे शहरात खळबळ उडाली असून पोलिसांकडून पुढील तपास सुरू असल्याची माहिती मिळाली आहे.
टिप्पण्या
टिप्पणी पोस्ट करा