ग्लोबल विकास ट्रस्ट आणि परळी नगरपालिकेचा स्तुत्य उपक्रम; पथनाट्यातून दिला वृक्षसंगोपनाचा संदेश
परळी वैजनाथ (प्रतिनिधी) पर्यावरण संवर्धन आणि वृक्षसंगोपनाचा प्रभावी संदेश देण्यासाठी परळी शहरात आज एका विशेष जनजागृतीपर पथनाट्याचे आयोजन करण्यात आले होते. ग्लोबल विकासच ट्रस्ट, नगरपालिका प्रशासन आणि स्थानिक वृक्षसंवर्धन चळवळ यांच्या संयुक्त विद्यमाने हा स्तुत्य उपक्रम हाती घेण्यात आला आहे.
आज, शुक्रवार २६ जून रोजी शहरातील प्रमुख आणि गजबजलेल्या भागात या पथनाट्याचे सादरीकरण करण्यात आले. यामध्ये मोंढा मार्केट, बस स्टँड, छत्रपती शिवाजी महाराज चौक आणि नेहरू चौक तळ परिसराचा समावेश होता. या पथनाट्याला परळीकरांनी प्रचंड गर्दी करत उत्स्फूर्त प्रतिसाद दिला.
नाट्यातून दिला 'झाडे लावा, झाडे जगवा'चा संदेश
वाढते प्रदूषण आणि निसर्गाचा बिघडत चाललेला समतोल या पार्श्वभूमीवर मानवी जीवनात वृक्षांचे काय महत्त्व आहे, हे कलाकारांनी आपल्या प्रभावी अभिनयातून मांडले. केवळ झाडे लावणे पुरेसे नसून त्यांचे संगोपन करणे ही काळाची गरज कशी बनली आहे, यावर पथनाट्यातून प्रकाश टाकण्यात आला. पाणीटंचाई, ग्लोबल वॉर्मिंग आणि वृक्षतोडीचे दुष्परिणाम अत्यंत सोप्या आणि अंगावर शहारे आणणाऱ्या प्रसंगांतून लोकांसमोर मांडण्यात आले.
ग्लोबल विकास ट्रस्ट आणि प्रशासनाचा स्तुत्य पुढाकार
ग्लोबल विकास ट्रस्ट आणि स्थानिक वृक्षसंवर्धन चळवळीचे कार्यकर्ते गेल्या अनेक दिवसांपासून शहरात पर्यावरणपूरक कामांमध्ये सक्रिय आहेत. या मोहिमेला नगरपालिका प्रशासनाची मोलाची साथ लाभली आहे. प्रशासकीय अधिकारी आणि सामाजिक कार्यकर्त्यांनी नागरिकांना आपल्या वाढदिवसाला किंवा महत्त्वाच्या प्रसंगी किमान एक तरी झाड लावून ते जगवण्याचे आवाहन केले.
नागरिकांची प्रत्यक्ष सहभागाची ग्वाही
शहरातील मुख्य चौकांमध्ये झालेल्या या सादरीकरणाने उपस्थित प्रेक्षकांना भावूक केले. अनेक नागरिकांनी केवळ नाटक न पाहता, आपणही या वृक्षसंगोपनाच्या चळवळीत सक्रिय सहभाग नोंदवू आणि परळी शहर हिरवेगार करण्यासाठी प्रयत्न करू, अशी ग्वाही दिली. या उपक्रमाबद्दल पर्यावरणप्रेमी आणि परळीकरांकडून आयोजकांचे कौतुक होत आहे.
टिप्पण्या
टिप्पणी पोस्ट करा