उपस्थित राहण्याचे आवाहन...

अव्वाच्या सव्वा विज बिलामुळे ग्राहक संतप्त; वीज वितरण कार्यालयाच्या कारभारावर प्रश्नचिन्ह

परळी : वापरापेक्षा अव्वाच्या सव्वा विज बिल येत असल्याने परळीतील वीज ग्राहक संतप्त झाले असून अन्यायकारक बिलांविरोधात आंदोलनाचा इशारा दिला आहे. विज बिल दुरुस्ती वेळेवर होत नसल्याने आणि कार्यालयातील कर्मचाऱ्यांकडून समाधानकारक माहिती मिळत नसल्याने नागरिकांना नाहक मनस्ताप सहन करावा लागत असल्याच्या गंभीर तक्रारी पुढे आल्या आहेत. सोमवारी अतिरिक्त कार्यकारी अभियंता, वीज वितरण कार्यालयात बिल प्रत काढणे व दुरुस्ती करून घेण्यासाठी ग्राहकांची मोठी गर्दी झाली होती. मात्र. अतिरिक्त कार्यकारी अभियंता व शहर शाखा अभियंता हे कार्यालयीन बैठकीसाठी बाहेरगावी गेल्याची माहिती देण्यात आली. दरम्यान, वीज वितरण कार्यालयाच्या अंदाधुंद कारभारामुळे ग्राहक वैतागले आहेत. वेळेवर बिल न मिळणे, चुकीचे व जादा रीडिंग दाखवून ग्राहकांची आर्थिक लूट करणे, तसेच दुरुस्तीसाठी आलेल्या ग्राहकांना सौजन्याऐवजी उद्धट वागणूक देणे, अशा तक्रारींमध्ये मोठी वाढ झाली आहे. अनेक वेळा ग्राहक आणि एका कर्मचाऱ्यांमध्ये वादही झाले आहेत. गेल्या आठवड्यात नातेवाईकाच्या बिल दुरुस्तीसाठी कार्यालयात गेलो असता बिल दुरुस्ती वेळेवर झाली नाही, उलट अपमानास्पद वागणूक मिळाली, अशी संतप्त प्रतिक्रिया मोहन चव्हाण यांनी दिली. तर विज बिल रीडिंग संदर्भात तक्रार करण्यासाठी कार्यालयात गेलो असता संबंधित कर्मचारी भेटले नाहीत आणि दुरुस्ती होत नसल्याने नाहक त्रास सहन करावा लागत आहे, अशी तक्रार सुधीर गोस्वामी यांनी केली. एकूणच, वीज वितरण कार्यालयाच्या ढिसाळ कारभारामुळे परळीतील वीज ग्राहकांमध्ये तीव्र नाराजी पसरली असून संबंधित वरिष्ठ अधिकाऱ्यांनी तातडीने लक्ष घालून अन्यायकारक बिलांचा प्रश्न मार्गी लावावा, अशी मागणी होत आहे. रीडिंग पेक्षा जास्त बिल ज्यांना येत आहेत त्यांनी दुरुस्तीसाठी शाखा अभियंत्याशी संपर्क साधावा व अर्ज करावा असे आवाहन अतिरिक्त कार्यकारी अभियंता वीज वितरण कार्यालय परळी यांनी केले आहे.