MB NEWS-परळीत पाव्हण्यांना येणंही झालं अवघड: मोटारसायकल चोरीचे सत्र सुरूच

 परळीत पाव्हण्यांना येणंही झालं अवघड: मोटार सायकल चोरीचे सत्र सुरूच

 

 परळी वैजनाथ, प्रतिनिधी...

         परळी व तालुक्यात गुन्हेगारी करणारांना मोकळे रान मिळाले आहे.कोरोनाकाळात उत्पन्नाचे सर्व स्त्रोत बंद झाले आहेत.प्रत्येकजण यातूनच जात आहे.मग चोर, चोरटे आणि भुरटे चोर यांचीही प्रचंड विवंचना झालेली आहे त्यामुळे संधी दिसताच डल्ला मारण्यासाठी चोरटे आसुसलेले आहेत.विविध ठिकाणांहून अनेकांच्या मोटारसायकली मोठ्या प्रमाणावर चोरीला जात असल्याचे  समोर आले आहे. बाहेरगावाहून आलेल्या पाहुण्याची मोटारसायकल काही वेळातच चोरीला गेल्याची घटना स्वातीनगर भागात घडली आहे.

          शहरातुन मोटारसायकलींची तर ग्रामीण भागात जनावरांची चोरी होत असल्याचे दिसून येते. सर्वत्र चोरीच्या घटना वाढल्या असल्याने यावर प्रतिबंधक उपाययोजना करण्याची गरज निर्माण झाली आहे. सुग्रीव संभाजी सांगळे  रा. चाटगाव ता.धारुर हे स्वातीनगर भागात राहणाऱ्या आपल्या पाव्हण्याकडे आपल्या मोटारसायकल वर आले होते.घरासमोर मोटारसायकल लावलेली होती.अज्ञात चोरट्यांनी या मोटारसायकल चे हॅण्डललाॅक तोडून मोटारसायकल चोरुन नेली.याप्रकरणी अज्ञात चोरट्याविरुद्ध पोलीस ठाण्यात गुन्हा दाखल करण्यात आला आहे.अधिक तपास शहर पोलीस करीत आहेत.