*सिरसाळा हद्दीत चोरट्यांचा धुमाकूळ......!*
*कौडगाव घोडा येथे शस्त्रांचा धाक दाखवून पावणे दोन लाखांची घरफोडी; नागरिकांमध्ये दहशत*
परळी वैजनाथ/प्रतिनिधी......
सिरसाळा परिसरात दररोज नोंद होत असलेल्या चोरीच्या घटनांनी खळबळ उडवून दिली आहे.परळी तालुक्यात चोरांना रान मोकळे झाले असल्याचे दिसून येत आहे.सिरसाळ्याच्या परिसरात चोरट्यांनी धुमाकूळ घातला असुन शस्त्रांचा धाक दाखवून घरफोडीची मोठी घटना कौडगाव घोडा येथे दि.२६ रोजी मध्यरात्रीच्या सुमारास घडली आहे.या घटनेने नागरिकांमध्ये दहशत पसरली आहे. या घरफोडीत सुमारे पावणे दोन लाखांचा ऐवज लंपास केल्याची घटना पोलीस ठाण्यात नोंद झाली आहे.
सध्याच्या काळात सर्वत्र चोरीच्या घटननांची साखळी खंडीत होत नसल्याने लोकांमध्ये एकप्रकारे मोठा धसका बसलेला आहे.अन्य कोणत्याही बाबींचा विचार न करता चोरीच्या घटनांपासून बचाव करण्यासाठी प्रत्येकाचे प्राधान्य आहे.अशाही परिस्थितीत चोरट्यांची मनस्थिती मात्र बदललेली दिसत नाही.सर्वत्र चोरटे धुमाकूळ घालत आहेत. दररोज चोरीच्या घटनांची नोंद पोलीस ठाण्यात होत आहे.काल (दि.२६) परळी तालुक्यातील कौडगाव घोडा येथे फिर्यादी मधुकर बाबुराव आगजाळ वय ६० वर्षे यांच्या घरातच किराणा दुकान आहे. रात्रीच्या सुमारास अनोळखी चार इसम घराचे चॅनल गेट तोडुन घरात घुसले.फिर्यादीच्या पत्नीस चाकु व कत्तीचा धाक दाखवून, मारहाण करून तब्बल १लाख ८० हजारांचा ऐवज लंपास केला. सशस्त्र चोरट्यांनी अक्षरशः सिनेस्टाईल धुमाकूळ घालत घरफोडी केली. अज्ञात चार चोरट्यांनी घुसुन घरातील सोन्या चांदीचे दागिने आणि रोख रक्कम असा१लाख ८० हजार रुपये किंमतीचा मुद्देमाल लंपास केला आहे. विशेष म्हणजे चोरटे चार जण होते.त्यांच्या तोंडावर रुमाल बांधलेले होते,हातात धारदार शस्त्र होती . चोरट्यांनी घरात प्रवेश करुन थेट मारहाण सुरू केली शस्त्रांचा धाक दाखवला.फिर्यादीच्या पत्नीला मारहाण केली.याप्रकरणी सिरसाळा पोलीस ठाण्यात गुन्हा दाखल करण्यात आला आहे.अधिक तपास पो.उपनि.शेळके हे करीत आहेत.
टिप्पण्या
टिप्पणी पोस्ट करा