देवदर्शनासह जनता जनार्दनाचे दर्शन घेऊ- पंकजा मुंडे

 पंकजा मुंडे करणार राज्यात शिव - शक्ती दर्शन दौरा !

राज्यातील ज्योतिर्लिंग व शक्तीपीठांच्या देवदर्शनासह जनता जनार्दनाचे दर्शन घेऊ- पंकजा मुंडे

परळी वैजनाथ, प्रतिनिधी...

            राजकारणापासून दोन महिन्याची सुट्टी जाहीर करून राजकीय वातावरणापासून काहीशा दूर असलेल्या भाजपा राष्ट्रीय सचिव पंकजा मुंडे यांनी गेल्या सोमवारी एक व्हिडिओ करुन लवकरच आपण जनता जनार्दनाचेही दर्शन घेण्यासाठी व भेटण्यासाठी येणार असल्याचे  सुतोवाच केले होते.त्यानंतर आज (दि.28) रोजी पुन्हा एक व्हिडिओ करुन  राज्यात शिव - शक्ती दर्शन दौरा करणार असल्याचे सांगितले आहे.

           सध्याच्या राजकीय परिस्थितीत आपण दोन महिन्याच्या सुट्टीवर जात असल्याचे जाहीर केल्यानंतर पंकजा मुंडे या राजकीय वातावरणापासून काहीशा दूर आहेत .मात्र त्यांच्या समाज माध्यमांमधून त्या लोकांशी सातत्याने संवाद साधत आहेतच. या दरम्यान गेल्या श्रावण सोमवार निमित्ताने पंकजा मुंडे यांनी एक व्हिडिओ करुन  लवकरच आपण जनताजनार्दनाचे दर्शन घेण्यासाठी येत असल्याचे म्हटले होते.  त्यानंतर आज त्यांनी आणखी एक व्हिडिओ समाजमाध्यमांत शेअर केला आहे.यामधून आपण राज्यात शिव - शक्ती दर्शन दौरा लवकरच करणार असल्याचे म्हटले आहे. या दौऱ्यात राज्यातील ज्योतिर्लिंग व शक्तीपीठांच्या देवदर्शनासह जनता जनार्दनाचे दर्शन घेऊन लोकांना भेटणार असल्याचे पंकजा मुंडे यांनी सांगितले आहे.