परळीतील गोळीबार प्रकरणात दुसरा गुन्हा दाखल !

परळीतील गोळीबार प्रकरणात दुसरा गुन्हा दाखल !

 परळी (प्रतिनिधी)

        परळी शहरातील बँक कॉलनी भागात शनिवार दि.29 जुन रोजी रात्री घडलेल्या गोळीबार प्रकरणाला वेगळे वळण प्राप्त झाले असुन मरळवाडीचे सरपंच बापुराव आंधळे यांच्या मृत्युनंतर या घटनेत पहिल्या दाखल गुन्ह्यात आरोपी म्हणून नाव असलेल्या व जखमी झालेल्या महादेव गित्ते यांच्या फिर्यादीवरुन परळी शहर पोलिस ठाण्यात गुन्हा दाखल करण्यात आला आहे.

 शनिवार दि.29 जुन रोजी परळी शहरातील बँक कॉलनी येथे रात्री गोळीबाराची घटना घडल्यानंतर याप्रकरणी गोट्या उर्फ ग्यानबा गित्ते याच्या फिर्यादीवरुन पाच जणांविरुध्द खुनाचा गुन्हा दाखल झाल्यानंतर या घटनेत जखमी असलेल्या महादेव उध्दव गित्ते रा.नंदागौळ,ह.मु.बँक कॉलनी परळी यांच्या फिर्यादीवरून आता या प्रकरणात दुसरा गुन्हा दाखल झाला आहे.याप्रकरणी पोलीस सुत्रांकडून प्राप्त अधिक माहितीनुसार, जखमी असलेल्या महादेव उध्दव गित्तेंवर अंबाजोगाई येथील स्वा.रा.ति. रुग्णालयात उपचार सुरु होते. महादेव गित्ते यांच्या फिर्यादीवरुन बुधवार दि.03 जुलै रोजी परळी शहर पोलिस ठाण्यात  बापु आंधळे (मयत), राजेश ऊर्फ धनराज श्रीरंग फड, रघुनाथ फड, ग्यानोबा ऊर्फ गोटया मारोती गित्ते,सनि देवडे,सोमनाथ सलगरे,वाल्मीक अन्ना व इतर अनोळखी 15 ते 20 इसमाविरुध्द गुरन 108/2024 कलम 307,326, 323,143, 147,148,149, 504, 506, 427 भादवी 3/25, 4/25 शस्त्र अधिनियम कायद्याअंतर्गत गुन्हा दाखल करण्यात असुन वरील आरोपींनी फिर्यादीच्या बँक कॉलनी परळी येथील घरासमोर दि.29 जुन रोजी रात्री 8.30 वाजेच्या सुमारास  गैरकायद्याची मंडळी जमवुन शिवीगाळ केली व घरावर विटा फेकुन मारल्या. फिर्यादीची भाड्याने आणलेली स्कॉर्पीओ गाडीची तोडफोड करुन नुकसान केले. फिर्यादी घराच्या बाहेर येताच आरोपींनी जिवे मारण्याच्या उद्देशाने फिर्यादीचे पोटावर पीस्टलने फायर करुन गंभीर जखमी केले व फिर्यादीचे हातावर जिवे मारण्याच्या उद्देशाने कोयत्याने वार केल्याचे फिर्यादीत नमुद करण्यात आले आहे.