MB NEWS:राजेभाऊ फड यांच्या नावाला मतदारांतून मोठी पसंती

ऑटोवालाच होणार परळीचा आमदार!

राजेभाऊ फड यांच्या नावाला मतदारांतून मोठी पसंती

परळी वैजनाथ (प्रतिनिधी)

परळी विधानसभा मतदारसंघाचे वातावरण हळूहळू तापू लागले आहे. नेहमीपेक्षा यंदाची निवडणूक ही वेगळ्या पद्धतीने होऊ घातली आहे. राजकीय पक्षांच्या फुटाफुटीला मतदार नागरिक वैतागले असून ते वेगळ्या पर्यायाचा शोध घेतला जात आहे. युवक नेते राजेभाऊ फड यांनी महाविकास आघाडीकडून उमेदवारी देण्याची मागणी केली होती. सर्व तयारी पूर्ण झालेली असतांनाही व सक्षम उमेदवार असतानाही पक्षाने त्यांना उमेदवारी न देता ऐनवेळी उमेदवार वेगळाच दिला. मात्र मतदारसंघातील जनतेत राजेभाऊ यांच्याच नावाला मोठी पसंती असल्याचे दिसून येत आहे. राजेभाऊ हे अतिशय साधारण कौटुंबिक परिस्थितीतून पुढे आलेले असून, काहीकाळ त्यांनी शहरात ऑटो चालवला आहे.

परळी विधानसभा मतदारसंघातील यंदाचे चित्र वेगळे दिसून येऊ लागले आहे. पक्षीय समीकरणे बदलली आहेत. निवडून येण्याचे गणित जरी उमेदवार लावू लागले असले तरीही मतदारसंघातील नागरिकांत सर्वसामान्यांच्या हक्काचा माणूस म्हणून राजेभाऊ फड यांच्या नावाला पसंती असल्याचे दिसून येत आहे. पक्षाने उमेदवारी डावलली असली तरी त्यांनी यंदाची विधानसभा निवडणूक लढवावी असा जनतेतून आग्रह दिसून येत आहे. राजेभाऊ फड यांची कौटुंबिक पार्श्वभूमी सुरुवातीच्या काळात अत्यंत संघर्षाची होती. उमेदीच्या काळात त्यांनी परळी शहरात काहीकाळ ऑटो चालवलेला आहे. मात्र जिद्द, चिकाटी आणि संघर्ष करून त्यांनी उद्योग क्षेत्रात उत्तुंग भरारी घेतली. सर्वसामान्य जनतेशी त्यांची नाळ कायम जोडलेली आहे. लोकांच्या अडचणीच्या काळात धाऊन जाणारा हक्काचा माणूस अशी त्यांची सर्वत्र प्रतिमा आहे. त्यामुळे त्यांनी या विधानसभा निवडणुकीतून माघार न घेता सर्वसामान्य जनतेच्या न्याय हक्कासाठी निवडणूक लढवावी असा आग्रह धरला जात असल्याने हा ऑटोचालक यंदा आमदार होणारच असा जनतेतून विश्वास व्यक्त केला जात आहे.