परळीत होणार जाहीर सभा !

नऊ तारखेला खा. शरदचंद्र पवार परळीत : जाहीर सभेचे आयोजन - ॲड. जीवनराव देशमुख

 परळी वैजनाथ, प्रतिनिधी...

        काँग्रेस, राष्ट्रवादी काँग्रेस शरदचंद्र पवार पक्ष, शिवसेना महाविकास आघाडीचे अधिकृत उमेदवार राजेसाहेब देशमुख यांच्या प्रचारार्थ शरद पवार यांची परळी येथे नऊ तारखेला जाहीर सभा होणार असल्याची माहिती राष्ट्रवादी काँग्रेस शरदचंद्र पवार पक्षाचे शहराध्यक्ष ॲड. जीवनराव देशमुख यांनी दिली आहे.

            परळी विधानसभा मतदारसंघातील महाविकास आघाडीचे अधिकृत उमेदवार राजेसाहेब देशमुख यांच्या प्रचारासाठी राष्ट्रवादी काँग्रेस शरदचंद्र पवार पक्षाचे सर्वेसर्वा शरद पवार हे बीड जिल्हा दौऱ्यावर असून परळी वैजनाथ येथे दिनांक 9 नोव्हेंबर रोजी त्यांची जाहीर सभा होणार आहे. महायुती सरकारच्या काळात सर्वसामान्य जनतेला बसलेल्या झळा आणि महाराष्ट्राच्या हिताच्या बाबतीमध्ये सपशेल अपयशी ठरलेल्या महायुती सरकारला धडा शिकविण्यासाठी या विधानसभा निवडणुकीत जनमत महाविकास आघाडीच्या बाजूने असुन शरद पवार यांच्या नेतृत्वाखाली येणाऱ्या काळात राज्यात महाविकास आघाडीचे सरकार स्थापन होणार आहे. या दृष्टिकोनातून सर्व कार्यकर्ते, पदाधिकारी यांनी कामाला लागण्याचे आदेश शरद पवार यांनी दिले आहेत. स्वतः शरद पवार हे महाविकास आघाडीच्या उमेदवारांच्या प्रचारार्थ ठिकठिकाणी जाहीर सभा घेत आहेत. त्याच अनुषंगाने परळी वैजनाथ येथेही दिनांक 9 रोजी शरद पवार  यांच्या उपस्थितीत जाहीर सभा होणार आहे अशी माहिती राष्ट्रवादी काँग्रेस शरद पवार पक्षाचे शहराध्यक्ष ॲड. जीवनराव देशमुख यांनी दिली आहे.