सिमेंट रस्त्यांवर डांबर टाकून खड्डे बुजवण्याचा प्रयत्न -ॲड. जीवनराव देशमुख
राष्ट्रवादी काँग्रेसकडून आंदोलनाची चेतावणी
परळी (प्रतिनिधी)
परळी शहरात नगरपालिकेच्या वतीने सिमेंट रस्त्यांवरील खड्डे डांबर टाकून बुजवण्याचा प्रकार सुरू असून, यामागे केवळ पालकमंत्र्यांच्या दौऱ्यानिमित्त शहरातील रस्त्यांची डागडुजी दाखवून मलिदा लाटण्याचा प्रयत्न असल्याचा आरोप राष्ट्रवादी काँग्रेस पार्टी (शरदचंद्र पवार गट) तर्फे करण्यात आला आहे.
शहरात तीर्थक्षेत्र विकास, नगरोत्थान योजना आणि विविध योजनांतून कोट्यवधी रुपये आले असतानाही रस्त्यांची अवस्था दयनीय आहे. विशेष म्हणजे, सिमेंट रस्त्यांवर डांबर टाकून खड्डे बुजवण्याचे काम सुरू असून, हे केवळ पालकमंत्र्यांसमोर शहराची प्रतिमा चांगली भासावी म्हणून केले जात आहे. त्यामुळे सिमेंट रस्त्यांवरील डांबर स्पॅचिंगसाठी बिल काढून पुन्हा आर्थिक बोजा टाकण्याची तयारी सुरू असल्याचा आरोपही या पक्षाकडून करण्यात आला.
राष्ट्रवादी काँग्रेसचे परळी शहराध्यक्ष अ‍ॅड. जीवन देशमुख यांनी मागणी केली आहे की, नगरपरिषदेचे मुख्याधिकारी तथा प्रशासक यांनी सदरील प्रकाराची गंभीर दखल घ्यावी. सिमेंट रस्त्यावर डांबर टाकण्याचे कोणतेही बिल मंजूर करू नये. तसेच रस्त्यांच्या दुरवस्थेस जबाबदार अधिकाऱ्यांवर कार्यवाही करावी आणि त्यांच्याकडून झालेल्या आर्थिक नुकसानीची वसुली करून दंड आकारावा.
या मागण्यांकडे दुर्लक्ष केल्यास राष्ट्रवादी काँग्रेस पार्टी (शरदचंद्र पवार) परळी शहरात तीव्र आंदोलन छेडेल, असा इशाराही अ‍ॅड. जीवन देशमुख यांनी दिला आहे.
टिप्पण्या
टिप्पणी पोस्ट करा