सहुलत विना व्याजी पतसंस्थेच्या वार्षिक कॅलेंडरचे थाटात उद्घाटन

 सावकारीचा संपूर्ण बहिष्कार करा ; युवकांनी व्याजापासून दूर राहा - मुफ्ती अश्फाक खासमी 

सहुलत विना व्याजी पतसंस्थेच्या वार्षिक कॅलेंडरचे थाटात उद्घाटन

परळी/प्रतिनिधी 

परळी शहरातील शहीद अब्दुल हमीद शादीखाना येथे आज शनिवारी दिनांक २७ डिसेंबर रोजी सायंकाळी ६.३० वाजता सहुलत विना व्याजी पतसंस्थेच्या वार्षिक कॅलेंडरचे उद्घाटन मोठ्या उत्साहात पार पडले.

या प्रसंगी संस्थेच्या सामाजिक व सेवाभावी कार्याचा आढावा घेण्यात आला. स्थापनेपासून आजपर्यंत पतसंस्थेने शहरातील सुमारे ५,००० हून अधिक गरजू नागरिकांना विना व्याज कर्जपुरवठा केला असून, या लाभार्थ्यांमध्ये सर्व जाती-धर्मातील नागरिकांचा समावेश आहे. आर्थिक अडचणीत सापडलेल्या कुटुंबांना व्याजाच्या जोखडातून मुक्त ठेवून स्वावलंबी बनवण्याचे महत्त्वपूर्ण कार्य ही संस्था करत आहे.

या कार्यक्रमाच्या अध्यक्षस्थानी, मुफ्ती अश्फाक खासमी होतं तर प्रमुख पाहुणे मौलाना तैमुर मिल्ली होते. तर मंचावर उपस्थित जमाते इस्लामी हिंदचे परळी शहराध्यक्ष इफ्तेखार सर, पतसंस्थेचे चेअरमन अन्वर सर, महेबुबिया एज्युकेशन सोसायटीचे अध्यक्ष खाजा मामू, सेक्रेटरी जाफर खान,मुखद्दस साहेब,अबरार खान व जिशान खान हे मान्यवर उपस्थित होते.

या कार्यक्रमात दोन प्रमुख वक्त्यांनी उपस्थितांना मार्गदर्शन केले.  मौलाना तैमुर मिल्ली यांनी सांगितले की, कुरआनमध्ये अनेक ठिकाणी अल्लाह तआलांनी व्याज याचा कठोर शब्दांत निषेध केला आहे. व्याज ही केवळ आर्थिक समस्या नसून ती समाजाच्या नैतिकतेला व कुटुंबव्यवस्थेला पोखरणारी घातक प्रवृत्ती आहे. त्यामुळे समाजाने विना व्याज व्यवहार स्वीकारून गरजूंची मदत करण्याची भूमिका घ्यावी, असे आवाहन त्यांनी केले.‌ नंतर मुफ्ती अश्फाक यांनी आपल्या प्रभावी भाषणात सांगितले की, सावकारी ही समाजातील सर्वात मोठी सामाजिक व्याधी असून ती संपवण्यासाठी सर्वांनी एकत्र येणे गरजेचे आहे. त्यांनी उपस्थितांना व्याजावर चालणाऱ्या सावकारी व्यवहारांचा संपूर्ण बहिष्कार (बॉयकॉट) करण्याचे आवाहन केले. तसेच, युवकांनी सावकारीपासून दूर राहावे व समाजात विना व्याज आर्थिक संस्कृती रुजवण्यासाठी पुढाकार घ्यावा,असा मोलाचा संदेश त्यांनी दिला.

या कार्यक्रमास पतसंस्थेचे सभासद तसेच परळी शहरातील नागरिक मोठ्या संख्येने उपस्थित होते. कार्यक्रम यशस्वीतेसाठी संस्थेच्या पदाधिकाऱ्यांनी विशेष परिश्रम घेतले.