सीसीटीव्हीत थार गाडी कैद, आरोपीला तातडीने अटक करण्याची मागणी

 नीट पुनर्परीक्षार्थींना एसटीचा मोफत प्रवास द्या; ॲड. जीवन देशमुख यांची मागणी

परळी | प्रतिनिधी

21 जून रोजी होणाऱ्या नीट (NEET) पुनर्परीक्षेसाठी विद्यार्थ्यांना आणि त्यांच्या पालकांना महाराष्ट्र राज्य मार्ग परिवहन महामंडळाच्या (एसटी) बसमधून मोफत प्रवासाची सुविधा उपलब्ध करून द्यावी, अशी मागणी राष्ट्रवादी काँग्रेस पक्षाचे माजी शहराध्यक्ष ॲड. जीवन देशमुख यांनी मुख्यमंत्री तथा परिवहन मंत्र्यांकडे केली आहे.

याबाबत प्रसिद्धीस दिलेल्या निवेदनात ॲड. देशमुख यांनी म्हटले आहे की, नीट परीक्षा यापूर्वी पार पडली होती. मात्र, पेपरफुटीच्या प्रकारामुळे विद्यार्थ्यांची व पालकांची कोणतीही चूक नसताना पुन्हा परीक्षा घेण्याची वेळ आली आहे. त्यामुळे विद्यार्थ्यांना मानसिक तणावासह आर्थिक भारही सहन करावा लागत आहे.

21 जून रोजी होणाऱ्या या पुनर्परीक्षेसाठी अनेक विद्यार्थ्यांना त्यांच्या गावापासून दूर असलेल्या परीक्षा केंद्रांवर जावे लागणार आहे. सध्या पेरणीचा हंगाम सुरू असून बहुतांश पालक शेतकरी व मजूर वर्गातील आहेत. अशा परिस्थितीत प्रवासाचा अतिरिक्त खर्च करणे अनेक कुटुंबांसाठी जिकिरीचे ठरत आहे, असे त्यांनी नमूद केले.

पंजाब राज्यात आम आदमी पक्षाच्या सरकारने नीट परीक्षार्थींना हॉलतिकीट दाखवून 20, 21 आणि 22 जून या कालावधीत मोफत प्रवासाची सुविधा उपलब्ध करून दिली आहे. त्याच धर्तीवर महाराष्ट्र शासनानेही नीट परीक्षार्थी आणि त्यांच्या एका पालकाला एसटी बसमधून मोफत प्रवासाची परवानगी द्यावी, अशी मागणी ॲड. जीवन देशमुख यांनी केली आहे.

विद्यार्थ्यांच्या हिताचा विचार करून मुख्यमंत्री तथा परिवहन मंत्र्यांनी याबाबत तातडीने सकारात्मक निर्णय घ्यावा, अशी अपेक्षाही त्यांनी व्यक्त केली आहे.