कला प्रदर्शनाला उत्स्फूर्त प्रतिसाद; विद्यार्थ्यांच्या कलाकृतींनी वेधले लक्ष

कलामयी आर्ट क्लासेसच्या तिसऱ्या कला प्रदर्शनाचे नगराध्यक्षा सौ. पद्मश्रीताई धर्माधिकारी यांच्या हस्ते झाले उद्घाटन

कला प्रदर्शनाला उत्स्फूर्त प्रतिसाद; विद्यार्थ्यांच्या कलाकृतींनी वेधले लक्ष

परळी वैजनाथ | प्रतिनिधी

       परळी शहरातील कला आणि सर्जनशीलतेला प्रोत्साहन देणाऱ्या मैथिली लोंढे यांच्या कलामयी आर्ट क्लासेस आयोजित तिसऱ्या भव्य कला प्रदर्शनास नागरिकांकडून उत्स्फूर्त प्रतिसाद मिळत आहे. दोन दिवस चालणाऱ्या या कला प्रदर्शनाचे उद्घाटन परळीच्या नगराध्यक्षा सौ. पद्मश्रीताई बाजीराव धर्माधिकारी यांच्या शुभहस्ते झाले. यावेळी भाजप नेत्या डॉ. शालिनी कराड यांची प्रमुख उपस्थिती होती.

     काळाराम मंदिर, आंबेवेस, परळी वैजनाथ येथे 20 व 21 जून रोजी आयोजित करण्यात आलेल्या या प्रदर्शनात विद्यार्थ्यांनी साकारलेल्या विविध कलाकृती आकर्षणाचा केंद्रबिंदू ठरत आहेत. ‘रंग, कल्पना आणि सर्जनशीलतेचा सुंदर संगम’ या संकल्पनेवर आधारित प्रदर्शनात चित्रकला, रेखाटन, क्रिएटिव्ह आर्ट, विविध पेंटिंग्ज, व्यक्तिचित्रे (पोर्ट्रेट), रंगोळी तसेच इतर अनेक कलाकृतींचा समावेश करण्यात आला आहे. विद्यार्थ्यांच्या कल्पकतेतून साकारलेल्या या कलाकृती पाहण्यासाठी कला रसिक, पालक व नागरिक मोठ्या संख्येने उपस्थित राहत आहेत.

     यासोबतच कलामयी आर्ट क्लासेसच्या वतीने रविवारी (दि. 21 जून) चित्रकला स्पर्धेचे आयोजन करण्यात आले आहे. इयत्ता 5 वी ते 7 वी आणि 8 वी ते 10 वी अशा दोन गटांमध्ये ही स्पर्धा होणार असून अंतराळ संशोधन, एक झाड-चार ऋतू, पाण्याखालील दृश्य, प्रेरणादायी व्यक्तीचे व्यक्तिचित्र, माझ्या आवडत्या खेळाचे दृश्य तसेच गाव व ग्रामीण जीवन अशा विविध विषयांचा समावेश करण्यात आला आहे. स्पर्धेतील प्रत्येक गटातून तीन विजेत्यांची निवड करण्यात येणार असून त्यांना आकर्षक बक्षिसे देऊन गौरविण्यात येणार आहे. विद्यार्थ्यांनी मोठ्या संख्येने सहभागी व्हावे, असे आवाहन  कलामयी आर्ट क्लासेस संचालिका मैथिली लोंढे यांनी  केले आहे. कलेची आवड जोपासणाऱ्या विद्यार्थ्यांच्या मेहनतीला प्रोत्साहन मिळावे आणि त्यांच्या कलागुणांना योग्य व्यासपीठ उपलब्ध व्हावे, या उद्देशाने या प्रदर्शनाचे आयोजन करण्यात आले आहे. प्रदर्शनासाठी प्रवेश विनामूल्य असून नागरिकांनी प्रदर्शनाला भेट देऊन विद्यार्थ्यांना प्रोत्साहन द्यावे, असे आवाहन आयोजकांनी केले आहे.