सेवानिवृत्तीनंतरही कार्यतत्परता.....

 डॉ. हरिभाऊ बंडेराव पांडे यांचा सेवाभावी प्रवास; ‘महापशुधन एक्सपो 2026’मध्ये मोलाच्या योगदानाबद्दल गौरव

परळी वैजनाथ | प्रतिनिधी

परळी वैजनाथ येथील सहायक आयुक्त पशुसंवर्धन पदावर कार्यरत असलेले डॉ. हरिभाऊ बंडेराव पांडे यांनी ३१ जानेवारी २०२६ रोजी आपला प्रदीर्घ सेवाकाल विनाडाग पूर्ण करत सेवानिवृत्ती स्वीकारली. जवळपास तीन दशकांहून अधिक काळ त्यांनी पशुसंवर्धन विभागात विविध जिल्ह्यांमध्ये अत्यंत प्रामाणिकपणे व समर्पित भावनेने सेवा बजावली.

डॉ. पांडे यांनी जालना, कोल्हापूर, परभणी तसेच बीड जिल्ह्यातील विविध ठिकाणी पशुवैद्यकीय सेवा दिली. ग्रामीण भागातील शेतकरी, पशुपालक आणि दुर्गम क्षेत्रातील जनतेपर्यंत आधुनिक पशुवैद्यकीय सुविधा पोहोचविण्यात त्यांचे योगदान उल्लेखनीय राहिले. लसीकरण मोहिमा, पशुरोग प्रतिबंधक शिबिरे, जनजागृती उपक्रम आणि पशुधन विकास योजनांची प्रभावी अंमलबजावणी यामध्ये त्यांनी पुढाकार घेतला.

सेवानिवृत्तीनंतरही त्यांनी आपली कार्यतत्परता कायम ठेवत महापशुधन एक्सपो 2026 या अखिल भारतीय पशुप्रदर्शनाच्या आयोजनात सुरुवातीपासून सक्रिय सहभाग नोंदविला. मा. आयुक्त पशुसंवर्धन, महाराष्ट्र राज्य यांच्या सूचनेनुसार त्यांनी नियोजन, समन्वय आणि व्यवस्थापन या सर्व बाबींमध्ये मोलाचे मार्गदर्शन केले. त्यांच्या अनुभवसंपन्न नेतृत्वामुळे या भव्य प्रदर्शनाचे आयोजन यशस्वीरीत्या पार पडले.

त्यांच्या उल्लेखनीय योगदानाची दखल घेत डॉ. पंकजाताई गोपीनाथराव मुंडे (मंत्री, पशुसंवर्धन व पर्यावरण) यांच्या शुभहस्ते त्यांचा सन्मान करण्यात आला. यावेळी मा. आयुक्त पशुसंवर्धन डॉ. प्रविणकुमार देवरे तसेच अतिरिक्त आयुक्त डॉ. शितलकुमार मुकने उपस्थित होते.