ज्येष्ठ पत्रकार लक्ष्मण वाकडे यांच्या ‘धडपड’ या लेख संग्रहाचे प्रकाशन

‘धडपड’ हा लेखसंग्रह पत्रकारिता क्षेत्रातील नव्या पिढीसाठी मार्गदर्शक-प्रशांत जोशी

ज्येष्ठ पत्रकार लक्ष्मण वाकडे यांच्या ‘धडपड’ या लेख संग्रहाचे  प्रकाशन

परळी वैजनाथ, (प्रतिनिधी)ः- 

‘धडपड’ हा लेखसंग्रह पत्रकारिता क्षेत्रातील नव्या पिढीसाठी उपयुक्त तर आहेतच शिवाय तो मार्गदर्शकही आहे असे प्रतिपादन माजीमंत्री आमदार धनंजय मुंडे यांचे स्वीय सहाय्यक प्रशांत जोशी यांनी केले.

         परळीतील शिक्षक ,ज्येष्ठ पत्रकार व साहित्यिक लक्ष्मण वाकडे यांच्या ‘धडपड’ या लेखसंग्रहाचे प्रकाशन शनिवारी (ता.२१) येथील नेहरू चौक परिसरातील हनुमान कॉम्प्लेक्स येथे श्री जोशी यांच्या हस्ते झाले. यावेळी ते बोलत होते. ज्येष्ठ पत्रकार संजय खाकरे, जगदीश शिंदे, न्यू हायस्कूलचे पर्यवेक्षक दाजीबा नखाते, ज्येष्ठ शिक्षक बाबासाहेब मुंडे, सुर्यकांत कातकडे, अमोल कांबळे, राहुल ताटे, सचिन काळम,  पत्रकार दत्ता शिवगण, मोहन साखरे, माऊली होळंबे, रामदास कराड आदी मान्यवर यावेळी उपस्थित होते.

प्रशांत जोशी यावेळी म्हणाले की, गेली चार दशके परळीच्या पत्रकारिता क्षेत्रात कार्यरत असलेले लक्ष्मण वाकडे यांनी आपल्या पत्रकारितेच्या माध्यमातून विविध विषयावर लेखन केले आहे. सर्वसामान्यांचे प्रश्न वृत्तपत्रात मांडून त्यांना न्याय दिला आहे. वेगळ्या बातम्या व विषय त्यांनी मांडले आहेत. आपल्या कामातून त्यांनी आदर्श उभा केला आहे. अनेक पत्रकार घडवले आहेत असे सांगून  जोशी यांनी परळीचा इतिहास डिजीटल स्वरूपात तयार केला जावा व इथे येणार्‍या पाहुण्यांचे स्वागत इथल्या इतिहासाचे, लेखकांचे पुस्तक देऊन व्हावे अशी अपेक्षा व्यक्त केली.

      प्रास्ताविक राहुल ताटे यांनी केले. यावेळी संजय खाकरे, बाबासाहेब मुंडे, सुर्यकांत कातकडे यांनी लक्ष्मण वाकडे यांची पत्रकारिता व ग्रंथसंपदा नव्या पिढीसाठी आदर्श आहे असे सांगितले. श्री वाकडे यावेळी बोलताना म्हणाले की, परळीत बातमीदार म्हणून ‘सकाळ’, ’पुढारी’, परळी परिसर यांसह इतर विविध वृत्तपत्रात काम करत असताना मनात फुललेल्या व या वृत्तपत्रातून प्रसिद्ध झालेल्या निवडक लेखांचा ‘धडपड’ या लेख संग्रहात समावेश आहे. हा पहिला भाग असून लवकरच आणखी दोन भाग येणार आहेत असे सांगून यासाठी सहकार्य लाभलेल्यांचे त्यांनी आभार मानले. परळी येथील सुधांशू प्रकाशन संस्थेतर्फे हा लेख संग्रह प्रकाशित करण्यात आला आहे. प्रकाशन संस्थेतर्फे या लेख संग्रहाची मांडणी करणारे दत्ता शिवगण यांचा यावेळी  जोशी यांच्या हस्ते सत्कार करण्यात आला. सुत्रसंचालन व आभार प्रदर्शन अमोल कांबळे यांनी केले.

      दरम्यान,  वाकडे यांचे हे पंचेवीसावे पुस्तक आहे. विविध बालकुमार कथा संग्रहासह श्री वैद्यनाथ ज्योतिर्लिंग परळीवरील त्यांची अनेक पुस्तके वाचकप्रिय झाली आहेत. ‘वैद्यनाथाची परळी’ या ग्रंथाच्या सहा आवृत्या व ‘श्री वैद्यनाथ ज्योतिर्लिंग स्थळ कथा महात्म्य’ या ग्रंथाच्या तीन आवृत्या प्रकाशित झाल्या आहेत.