नगराध्यक्षा सौ. पद्मश्री धर्माधिकारी यांच्या हस्ते झालं उद्घाटन

परळीतील मोकाट जनावरांवर नियंत्रणासाठी कोंडवाडा सुरु

नगराध्यक्षा सौ. पद्मश्री धर्माधिकारी यांच्या हस्ते झालं उद्घाटन

परळी वैजनाथ: प्रतिनिधी....

    शहरातील मोकाट जनावरांच्या वाढत्या त्रासावर अखेर प्रभावी उपाय म्हणून परळी नगर परिषदेने समता नगर परिसरात ‘कॅटल पाउंड’ (कोंडवाडा) सुरू केला असून, या उपक्रमाचे उद्घाटन नगराध्यक्षा सौ. पद्मश्रीताई बाजीराव धर्माधिकारी यांच्या हस्ते सोमवारी उत्साहात पार पडले. शहरातील नागरिकांच्या सुरक्षिततेसाठी आणि वाहतुकीच्या सुरळीततेसाठी हा निर्णय अत्यंत महत्त्वाचा ठरणार आहे.

      नगराध्यक्षा सौ. पद्मश्रीताई बाजीराव धर्माधिकारी यांच्या नेतृत्वाखाली राबविण्यात आलेल्या या उपक्रमामुळे शहरातील मुख्य रस्ते आणि चौकांमधील वाहतूक कोंडी कमी होण्यास मदत होणार असून, नागरिकांना दिलासा मिळणार आहे. परळी शहर स्वच्छ, सुरक्षित आणि नियोजनबद्ध करण्याच्या दिशेने कोंडवाडा हे आणखी एक महत्त्वाचे पाऊल उचलले गेले आहे. या कार्यक्रमास माजी नगराध्यक्ष बाजीराव भैय्या धर्माधिकारी, पाणीपुरवठा सभापती सौ. जयश्री गित्ते, रवींद्र गित्ते,रमेश पवार,अशोक पवार, स्वच्छता निरीक्षक राहुल धनवाडे,काळे, सुनिल आदोडे, राज गायकवाड तसेच नगर परिषदेचे अधिकारी व कर्मचारी मोठ्या संख्येने उपस्थित होते.

      याप्रसंगी नगराध्यक्षा सौ.पद्मश्रीताई बाजीराव धर्माधिकारी यांनी सांगितले की, परळी शहरात मोकाट जनावरांमुळे नागरिकांना मोठ्या प्रमाणावर त्रास सहन करावा लागत होता. अपघातांची शक्यता वाढत होती. मोकाट जनावरांचा बंदोबस्त करावा अशी नागरिकांतून मोठी मागणी होती.या पार्श्वभूमीवर नागरिकांची मागणी लक्षात घेऊन नगर परिषदेने कोंडवाडा सुरू करण्याचा निर्णय घेतला. हा उपक्रम शहराच्या शिस्तबद्ध विकासासाठी महत्त्वाचा टप्पा आहे.रस्त्यावर मोकाट फिरणारी जनावरे पकडून थेट कोंडवाड्यात ठेवली जातील आणि संबंधित पशुपालकांकडून दंड आकारला जाईल. त्यामुळे पशुपालकांनी आपली जनावरे मोकाट सोडू नयेत असे आवाहनही त्यांनी केले.